आरोग्य प्रतिष्ठानलाई तिन थान डाइलासिस

हेल्थ टुडे
रोटरी क्लब अफ राजधानीले विपन्न मिर्गौला विरामीको उपचारका लागि आरोग्य प्रतिष्ठानलाई तीन थान हेमो डाइलासिस मेसिन सहयोग स्वरुप प्रदान गरेको छ । हाल आरोग्य प्रतिष्ठानमा १७ वटा हेमो डायलाईसिस मेसिनहरु छन । यी मेसिनले दैनिक ७० जना विरामीलाई सेवा प्रदान गरि रहेका छन् । प्रतिष्ठानकी अध्यक्ष आनी छोइङ डोल्मा र सदस्य सचिव मिर्गौला प्रत्यारोपण विज्ञ डा. पुकारचन्द्र श्रेष्ठले डाइलासिस मेसिन ग्रहण गर्दै सहयोग स्वरुप प्राप्त मेसिनले विपन्न मिर्गौला विरामीको उपचारमा थप राहत मिल्ने बताए । आरोग्य प्रतिष्ठानले स्थापना कालदेखि नै मिर्गौला प्रत्यारोपण गर्नको लागि अत्यावश्यक एचएलए ल्याव सेवा, प्रत्यारोपण गरेका विरामीहरुले सेवन गर्ने औषधिको मात्रा जाँच गर्ने अत्याधुनिक ल्याव सेवा र नेपाल सरकारले विपन्न नागरिकको लागि संचालन गरेको निःशुल्क हेमोडायलाइसिस सेवा संचालन गरि रहेको छ ।
विज्ञहरुका अनुसार प्रत्येक १० जना मध्ये एक जनालाई मृगौला रोग लाग्ने गर्दछ । नेपालमा बर्षेनी तीन हजारको मृगौला फेल हुने गरेको छ । सरकारले हालै मात्र मिर्गौलाका विरामीका लागि राहत स्वरुप डाइलासिस सेवा निशुल्क गरेको छ । कार्यक्रममा डा. श्रेष्ठले डायलाइसिस सेवा निशुल्क गर्ने सरकारको निर्णय स्वागत योग्य भएको बताउँदै प्रत्यारोपण पनि निशुल्क हुनु पर्ने र प्रत्यारोपण पछिको औषधि समेत निशुल्क गराउनु आवश्यक रहेकोमा जोड दिए । समारोहमा उद्योग राज्यमन्त्री मेघराज नेपाली निसादले देशमा नै उच्च स्तरीय डायलाइसिस र प्रत्यारोपण सेवा उपलब्ध हुनु खुशीको कुरा भएको बताए । निसादको एक बर्ष अगाडि मात्र मानव अङ्ग प्रत्यारोपण केन्द्र भक्तपुरमा मिर्गौला प्रत्यारोपण गरिएको थियो ।