समान्य हिडडुल गर्न सक्ने भए पारस, स्वास्थ्यमा क्रमिक सुधार

हेल्थ टुडे,

काठमाडौं, १८ माघ : तेश्रो पटक हृदयघात भएर थापाथलीस्थित नर्भिक इन्टरनेशनल हस्पिटलमा भर्ना भएका पूर्व युवराज पारस साहको स्वास्थ्य अवस्थामा क्रमिक सुधार भइरहेको अस्पतालले जनाएको छ । नर्भिकका सञ्चार एवं जनसम्पर्क विज्ञ आरपी मौनालीका अनुसार पारस अहिले वार्डमा समान्य हिडडुल गर्न र समान्य क्रियाकलाप गर्न सक्ने भएका छन । उनको स्वास्थ्य अवस्थामा दिनप्रतिदिन क्रमिक सुधार भइरहेको पाइएको छ । हृदयघात भएपछि उनलाई यही माघ १४ गते उपचारका लागि थापाथलीस्थित नर्भिक इन्टरनेशनल हस्पिटलको आकस्मिक कक्षमा ल्याइएको थियो । त्यसपछि उनलाई क्याथल्यावमा सारेर कोरोनरी एन्जियोग्राम गर्दा मुटुको धमनी पूर्णरुपमा बन्द रहेको पाइएको थियो । उपरोक्त बन्द (अवरोध) खुलाउन कोरोनरी एन्जियोप्लाष्टी तथा स्टेन्ट प्रत्यारोपण गरिएको र उक्त कार्य सफलतापूर्वक सम्पन्न भएको थियो । उनको उपचारमा मुटुरोग विशेषज्ञ डा. यादवदेव भट्ट सहित डा. जे.पी. जैसवाल, डा. नग्मा श्रेष्ठ, डा. सन्तोष श्रेष्ठ र एनेस्थेसियोलोजिष्ट डा. प्रज्वल श्रेष्ठको टोली संलग्न रहेको थियो । पारसलाई कहिले डिस्चार्ज गर्ने भन्ने बिषयमा अस्पतालले केही बताएको छैन ।