मेडिकल कलेजका सञ्चालकविरुद्ध सम्पत्ति शुद्धीकरण विभागमा उजुरी

हेल्थ टुडे,
काठमाडौ,२२ फागुनः गण्डकी मेडिकल कलेजका विद्यार्थीहरुले मेडिकल कलेज सञ्चालकविरुद्ध सम्पत्ति शुद्धीकरण विभागमा उजुरी दिएका छन् । सरकारले तोकेको शुल्क भन्दा विद्यार्थीबाट बढी रकम असुलेको भन्दै शुल्कबृद्धिको विरोधमा आन्दोलनरत गण्डकी मेडिकल कलेजका विद्यार्थीहरुले सञ्चालक विरुद्ध सम्पत्ति शुद्धीकरण अनुसन्धान विभागमा उजुरी दिएका हुन् ।
विद्यार्थीहरुले चिकित्सा शिक्षा सुधार अभियानमा संलग्न अभियान्ताहरुको सहयोगमा मंगलबार उजुरी दर्ता गराएका हुन्।
विद्यार्थीहरुले अवैध रुपमा उठाएको शुल्कको छानबिन गर्नुपर्ने लगायतका माग राख्दै सम्पत्ति शुद्धीकरण विभागमा उजुरी दिएको जानकारी दिएका छन् ।
कलेज सञ्चालकको मिलेमतोमा कलेजका प्रिन्सिपल, प्रशासकीय अधिकृत, लेखा शाखाका प्रमुख लगायतले विद्यार्थीबाट अवैध रुपमा बढी शुल्क लिएको भन्दै विद्यार्थीले आन्दोलन गर्दै आएका छन्।
कलेजले विद्यार्थीबाट सरकारले तोकेको शुल्कभन्दा १० देखि १५ लाखसम्म बढी रकम उठाएको आरोप छ । तोकिएभन्दा बढी शुल्क लिएको भन्दै माघ १७ देखि चरणबद्ध आन्दोलन गर्दै आएका विद्यार्थीले आइतबार सडक प्रर्दशन गरेका थिए । अतिरिक्त शुल्क फिर्ता हुनुपर्ने, सरकारले तोकेको शुल्कमा पढ्न पाउनुपर्ने र विद्यार्थीले तिरेको रकमको बिल, भौचर र रसिद उपलब्ध गराउनुपर्ने माग आन्दोलनरत विद्यार्थीहरुको माग छ ।
सरकारले काठमाडौँ उपत्यकाबाहिर एमबिबिएस पढ्ने विद्यार्थीले रु ४२ लाख ४५ हजार शुल्क तोकेपनि गण्डकी मेडिकल कलेजले ५५ लाखभन्दा बढी शुल्क असुलेको विद्यार्थीहरुको आरोप छ ।