हेल्थ टुडे,
काठमाडौ,८ चैतः ग्रामीण स्वास्थ्यकर्मीहरुको १० औँ सम्मेलन यही चैत ११ देखि १३ गतेसम्म काठमाडौँमा आयोजना हुँदैछ । ग्रामीण क्षेत्रमा प्रवाह भईरहेको स्वास्थ्य सेवाको अवस्था, चुनौती र समाधानका उपायबारे छलफल र आवश्यक तालीम प्रदान गर्ने उद्देश्यले सम्मेलन आयोजना गरिएको हो । राष्ट्रिय स्वास्थ्य तालीम केन्द्र र निक साइमन्स इन्ष्टिच्यूटद्वारा हरेक वर्ष आयोजना हुने उक्त सम्मेलनमा यसपटक पनि सातवटै प्रदेशबाट १२५ जना स्वास्थ्यकर्मीको सहभागिता रहने जनाइएको छ । उक्त सम्मेलनमा निक साइमन्स पुरस्कार २०१८ समेत प्रदान गरिनेछ ।
सम्मेलनमा ग्रामीण क्षेत्रका कार्यरत चिकित्सक, नर्स, स्वयंसेविकाले आफ्ना उत्कृष्ट स्वास्थ्य सफलतालाई प्रस्तुत समेत प्रस्तुत गर्नेछन् ।
जिम र मेरिलिन्स साइमन्सले आफ्ना दिवंगत छोरा निक साइमन्सको सम्झनामा स्थापना गरेको यो इन्ष्टिच्यूटले सन् २००८ देखि ग्रामीण स्वास्थ्यकर्मी सम्मेलन आयोजना गर्दै आएको छ । स्वास्थ्य तथा जनसंख्या मन्त्रालयमार्फत् सो संस्थाले हाल वर्षेनि रु ३५ देखि ४० करोड नेपालको स्वास्थ्य सेवा सुधारका लागि खर्च गर्दै आएको छ ।
‘अस्पताल सहयोग विकास कार्यक्रम’ मार्फत् यो संस्थाले ग्रामीण क्षेत्रका स्वास्थ्यका उपकरण, स्वास्थ्यकर्मी, भौतिक पूर्वाधार, तालीमलगायत गुणस्तरीय स्वास्थ्य सेवा सुधारका लागि सहयोग गर्दै आएको छ । संस्थाले विभिन्न १८ जिल्लामा कार्यक्रम गर्दै आएको र आगामी दिनमा २५ जिल्लामा योजना सञ्चालन गर्ने जनाएको छ । सम्मेलनको उद्घाटन उपप्रधानमन्त्री तथा स्वास्थ्य तथा जनसंख्या मन्त्री उपेन्द्र यादवले गर्ने कार्यतालिका छ ।
Leave a Reply