हेल्थ टुडे,
काठमाडौ,११ चैतः विद्यार्थीबाट अबैध शुल्क उठाएको विषयमा छानविन गर्न गठित सरकारी छानबिन टोलीले किस्ट मेडिकल कलेजले एमबिबिएस अध्ययन गर्ने विद्यार्थीबाट अवैध शुल्क उठाएको ठहर गरेको छ । टोलीले बढी लिएको शुल्क विद्यार्थीलाई फिर्ता गर्न र कलेज सञ्चालकलाई कारबाही गर्न सरकारलाई सिफारिस गरेको छ ।
कलेजले अवैध शुल्क उठाएको र त्यसको विरोध गर्ने विद्यार्थीलाई आन्तरिक परीक्षामा फेल गरिएको समाचार प्रकाशित भएपछि प्रधानमन्त्री केपी ओलीले गम्भीर चासो व्यक्त गर्दै उनकै निर्देशनमा शिक्षा मन्त्रालयका सहसचिव डा.हरिप्रसाद लम्सालको संयोजकत्वमा सतर्कता केन्द्रको समेत प्रतिनिधित्व रहेको चार सदस्यीय छानबिन टोली गठन गरिएको थियो ।
कलेजले विद्यार्थीबाट अवैध शुल्क उठाउनुका साथै उत्तरपुस्तिका जाँचमा पनि चरम लापरबाही गरेको प्रतिवेदन टोलीले प्रधानमन्त्रीलाई बुझाएको छ । छानबिन समितिका एक सदस्यका अनुसार कलेज सञ्चालकले तोकिएभन्दा बढी शुल्क लिएको स्वीकार गरेका छन् । विश्वविद्यालय, परीक्षा, रजिस्ट्रेसन, काउन्सिल शुल्कलगायत नाममा बढी रकम उठाइएको छ । प्रतिवेदनमा अवैध शुल्क लिने कलेजलाई प्रचलित कानुनबमोजिम कारबाही गर्न सिफारिस गरिएको छ ।
यसैबीच, छानबिन टोलीले कलेजसँग आन्तरिक परीक्षाको उत्तरपुस्तिका र कागजात मागेको थियो । एउटा सेमेस्टरमा ९० विद्यार्थीको सिट भएपनि कलेजले करिब तीन दर्जन उत्तरपुस्तिका मात्र उपलब्ध गराएको थियो । छानबिन टोलीका एक सदस्यले ४१ विद्यार्थी फेल भएको पाइएको बताए ।
उपलब्ध गराइएका उत्तरपुस्तिकामा दिइएको प्राप्तांक ठीक हो–होइन भन्ने यकिन गर्न विज्ञहरूबाट थप छानबिन गर्न टोलीको सिफारिस छ । आन्तरिक परीक्षाको कार्यविधि बनाएर परीक्षा सञ्चालन गर्नुपर्ने र कडाइका साथ अनुगमन गरिनुपर्ने सिफारिस सरकारी टोलीले गरेको छ । (नयाँ पत्रिका दैनिकबाट)
Leave a Reply