‘सहयोगी प्रविधि, सक्रिय सहभागिता’ भन्ने नाराका साथ विश्व अटिजम दिवस मनाईदै

हेल्थ टुडे,
काठमाडौ,१९ चैतः विभिन्न जनचेतनामुलक कार्यक्रम गरी आज विश्व अटिजम सचेतना दिवस मनाईदैछ । विश्व अटिजम सचेतना दिवसको लागि यो वर्ष ‘सहयोगी प्रविधि, सक्रिय सहभागिता’ नारा तय गरिएको छ । सन् २००८ देखि अप्रिल २ तारिखमा हरेक वर्ष यो दिवस मनाउने थालिएको हो । विश्वका हरेक ६८ जना नवजात शिशुमध्ये १ जनामा अटिजम हुने तथ्यांकमा उल्लेख छ ।

अटिजम भएका बालबालिकामा चकचक हुने वा निष्क्रिय हुने, आफैले केही गर्न नसक्ने, अरुसँग नखेल्ने, बोलाए पनि जवाफ नदिने, नसुनेको जस्तो गर्ने, कुनै काम राम्ररी गर्न नसक्ने, एउटै कुरा बारम्बार बोल्ने, घाउ भए पनि प्रतिक्रिया नदिने, हात खुट्टा चलाइरहने लगायतका समस्या हुन्छ ।

अटिजम जन्मजात बच्चामा देखिने एक प्रकारको अपांगता हो । यो जीवनभरसम्म रहने गर्छ । अटिजम हुनुको कारण वंशाणुगत मानिए पनि यसको मुख्य कारण अझै पत्ता लागेको छैन । अटिजम भएका बालबालिकाको आवाज नआउने, बोलेको कुरा ठेगान नहुने, छिनछिनमा रुने, हाँस्ने, जिद्दी गर्ने लगायतका बानी हुने भए पनि यो मानसिक समस्या भने नभएको विज्ञहरुले बताएका छन् ।

अटिजम बालिका भन्दा बालकलाई हुने सम्भावना पाँच गुणाले बढि हुने डाक्टरहरुको भनाई छ । बालबालिका दुई वर्षको हुँदा नै अटिजम भए–नभएको थाहा पाउन सकिने यस क्षेत्रका विज्ञहरुले बताएका छन् ।