हेल्थ टुडे,
एजेन्सी,२१ चैतः ब्रुनाईमा व्यभिचारी र समलिंगी यौन सम्बन्ध राख्नेमाथि ढुंगाले हिर्काएर मारिने समेतका कडा व्यवस्थाहरू समेटिएको नयाँ इस्लामिक (शरिया) लागू भएको छ । विश्वका राजनीतिक नेताहरू, अधिकारकर्मी तथा अभियन्ताहरूको चौतर्फी आलोचना र विरोधका बावजूद ब्रुनाईका सुल्तानले नयाँ कानुनमा हस्ताक्षर गरेका छन् । दक्षिण पूर्वी एसियाको सानो मुस्लिम राष्ट्र ब्रुनाईमा यो कानुन वर्षौंपछिको छलफलपश्चात् कार्यान्वयनमा आएको त्यहाँका सरकारी अधिकारीले जनाएका छन् ।
ब्रुनाईमा सुल्तान हस्सनल बोल्किया लामो समयदेखि सत्तामा छन् । नयाँ कानुनमा चोरी गर्नेहरूका हात र खुट्टा काटिने व्यवस्थासमेत गरिएको छ। ब्रुनाईको मुलुकी ऐनको यस्तो व्यवस्था खासगरी साउदी अरब समेतका खाडी राष्ट्रहरूमा प्रयोगमा छ । पूर्वी वा दक्षिण पूर्वी एसियामा कठोर शरिया कानुन देशव्यापी रुपमा पूर्ण कार्यान्वयन गर्ने ब्रुनाई पहिलो राष्ट्र हो।
ब्रुनाईको यस्तो निर्णयप्रति विश्व समुदायले कटु आलोचना गरेको छ। संयुक्तराष्ट्र संघले शरिया कानुनका व्यवस्थाहरू निर्मम र अमानवीय रहेको जनाएको छ । प्रसिद्ध नायक जर्ज क्लूनी, पपस्टार एल्टन जोन समेतका कलाकारहरूले पनि ब्रुनाईका सेवाहरू बहिस्कार गर्न आग्रह गरेका छन्। तर, ब्रुनाईका सुल्तानको कदमप्रति अरब राष्ट्रले स्वागत गरेका छन्।
ब्रुनाईका सुल्तान विश्वकै धनी व्यक्तिमा गनिन्छन्। सुल्तानले नयाँ शरिया कानुन ल्याउन सन् २०१३ मै घोषणा गरेका थिए। सन् २०१४ मा शरिया कानुनको पहिलो प्रस्ताव सार्वजनिक गरिएको थियो। पहिलो प्रस्तावित कानुनमा दण्डसजाय केही खुकुलो थियो।
Leave a Reply