हेल्थ टुडे,
काठमाडौ,६ जेठः बर्डफ्लु संक्रमणबाट पहिलोपटक मानिसको ज्यान गएपछि स्वास्थ्यकर्मी नै प्रभावित क्षेत्रमा जान डराउन थालेका छन्। गत १५ चैतमा बर्डफ्लुका कारण काभ्रेका २१ वर्षीय युवकको मृत्यु पुष्टि भएपछि सर्वसाधारणसँगै चिकित्सक पनि डराएको इपिडिमियोलोजी तथा रोग नियन्त्रण महाशाखाले जनाएको छ।
कुखुरा मार्न र औषधिका लागि खटाइएका स्वास्थ्यकर्मी पनि संक्रमित ठाउँमा जान हच्किन थालेको महाशाखा प्रमुख डा। विवेक लालले बताए। उनले भनेः‘विगतमा बर्डफ्लुका विषयमा कसैले चासो राख्दैनथे। मानिसकै मृत्यु भएपछि प्रत्यक्ष वा अप्रत्यक्ष जानकारी लिनेहरू बढेका छन्। संक्रमित क्षेत्रमा खटिन स्वाथ्यकर्मी पनि असहज मान्न थालेका छन् ।’
नेपालमा बर्डफ्लु देखिएको १० वर्ष भएको छ । पहिलोपटक ०६५ मा झापाका कुखुरामा देखिएको थियो । सन् १९९६ मा बर्डफ्लु (एचफाइभएनवन) भाइरस पत्ता लागेको थियो। विश्व स्वास्थ्य संगठनको तथ्यांकअनुसार यो भाइरसबाट सन् २००३ यता विश्वभर आठ सय ६० मानिस संक्रमित भएकोमा चार सय ५४ को ज्यान गएको छ।
सरुवारोग विशेषज्ञ डा। शेरबहादुर पुनका अनुसार पक्षीमा मात्रै देखिने यो भाइरस वेलावेला मानिसमा सर्ने गर्छ। तर, मानिसबाट मानिसमा भने हालसम्म नसरेको उनले बताए । महाशाखा प्रमुख डा.लालका अनुसार एचफाइभएनवान संक्रमणको रोकथामका लागि खोपको विकास भएको छ। तर, यो अझै पनि व्यापक उपयोगका लागि तयार भएको छैन । एन्टिभाइरल औषधिले बिरामीको गम्भीरता घटाउन र मृत्यु रोक्न सक्ने सम्भावना रहन्छ।
Leave a Reply