नेपालमा पहिलो पटक बर्ड फ्लूबाट एकजनाको मृत्यु

हेल्थ टुडे,
काठमाडौ,१९ बैशाखः नेपालमा पहिलो पटक बर्ड फ्लूबाट एकजनाको मृत्यु भएको छ । काभ्रेपलाञ्चोक जिल्लाका २१ वर्षीय एक युवकको बर्ड फ्लु (एच फाइभ एन वान) बाट मृत्यु भएको स्वास्थ्य मन्त्रालयले जनाएको छ । गत चैत १० गते ज्वरो र खोकीको लक्षणसहित शुक्रराज ट्रोपिकल तथा सरुवारोग अस्पताल, टेकुमा भर्ना भएका ती युवकको चैत १५ गते मृत्यु भएको स्वास्थ्य तथा जनसङ्ख्या मन्त्रालयले जनाएको छ ।

मृतकलाई इन्फ्लुएन्जा रोगको सङ्क्रमण भएको आशङ्कामा त्यसको यकिन गर्न नमूना परीक्षणका लागि जापान पठाइएको थियो । नमूना परिक्षणको रिपोट यही वैशाख १७ गते प्राप्त भएको जानकारी दिँदै मन्त्रालयले उनको निधन बर्ड फ्लुबाटै भएको पुष्टि भएको बताएको छ । मृतकको नाम भने खुलाइएको छैन।

मन्त्रालयले विश्व स्वास्थ्य सङ्गठनको प्रावधान अनुसार सो सम्बन्धमा कृषि तथा पशुपक्षी विकास मन्त्रालय काठमाडौँस्थित विश्व स्वास्थ्य सङ्गठनको दक्षिणपूर्वी एशिया क्षेत्रीय कार्यालय तथा नेपाल देशीय कार्यालयलगायत निकायसँग सहकार्य थालेको बताएको छ । मन्त्रालयले बिहीबार पत्रकार सम्मेलन गर्दै उक्त रोगको सङ्क्रमण फैलिन नदिन निगरानी बढाउनका साथै त्यसको विस्तृत अध्ययन थालिसकेको जनाएको छ ।

मन्त्रालयले बर्डफ्लुका लक्षणबारे सर्वसाधारणमा सूचनामूलक सामग्री प्रवाह गरिरहेको बताउँदै सो रोगबाट उच्च ज्वरो आउने, खोकी लाग्ने, घाँटी दुख्ने, मांशपेसी दुख्ने, प्रारम्भमा पेट र छाती दुख्ने र पखालासमेत लाग्न सक्ने जनाएको छ । उक्त रोगको सङ्क्रमण द्रुतगतिमा फैलिएर श्वास फेर्न कठिन हुने, निमोनिया र दमका लक्षण देखिने बताइएको छ । मन्त्रालयका अनुसार बर्डफ्लुबाट नेपालीको स्वदेशमै निधन भएको यो पहिलो घटना हो ।

मन्त्रालयका अनुसार अरु विरामीमा भने एच फाइट एन वानको संक्रमण देखिएको छैन । एच फाइट एन वान भाइरसले पंक्षीबाट संक्रमण गर्छ र कहिले काहीँ पक्षीबाटै मानिसमा समेत सर्छ । यो भाइरस पहिलो पटक १९९६ मा पत्ता लागेको थियो ।

विश्व श्वास्थ्य संगठनका अनुसार २००३ देखि हालसम्म विश्वभर ८६० जनामा एच फाइट एन वान भाइरसको संक्रमण भएको छ । त्यसमध्ये आधा जत्ति (४५४) मानिसको मृत्यु भएको तथ्यांक छ । तर, अहिलेसम्म एच फाइभ एन वान भाइरस मानिसबाट मानिसमा सरेको पुष्टि भने भएको छैन ।