हेल्थ टुडे,
खोटाङ,३ जेठः खोटाङ जिल्लामा स्वास्थ्य बीमा कार्यक्रमप्रति नागरिकको आकर्षण देखिएको छ । सरकारले लागू गरेको स्वास्थ्य बीमा कार्यक्रमवापतको सेवासुविधा प्राप्तिका लागि जिल्लाका १० स्थानीय तहमा स्वास्थ्य बीमा दर्ता कार्यक्रमलाई तीव्रगतिमा अघि बढाइएको र स्थानीयको पनि उत्तिकै आर्कषण देखिएको छ ।
जिल्लाको ऐंसेलुखर्क प्राथमिक स्वास्थ्य केन्द्र, चिसापानी प्राथमिक स्वास्थ्य केन्द्र, जिल्ला अस्पताल खोटाङ, जिल्ला अस्पताल उदयपुर, जिल्ला अस्पताल ओखलढुङ्गा, जिल्ला अस्पताल सोलुखुम्बु, धरान, विराटनगर, काठमाडौँ, भक्तपुरलगायतमा रहेका सरकारी अस्पतालबाट बीमाको शर्तअनुसार स्वास्थ्य उपचार सेवा लिन पाउनेगरी स्वास्थ्य बीमा दर्ता भइरहेको स्वास्थ्य बीमा बोर्ड खोटाङका संयोजक सन्तोष दाहालले बताए ।
हरेक वडामा नियुक्त स्वास्थ्य बीमा दर्ता सहयोगीले नाम दर्ता र परिचयपत्र वितरण गरिरहेको र विसं २०७४ पुस २४ गतेदेखि अहिलेसम्ममा १७ हजार ४५१ ले बीमा गरिसकेका उनले जानकारी दिए । १७ हजार बढीले स्वास्थ्य बीमाका लागि नाम दर्ता गरेर परिचयपत्र लिइसकेका छन् । जिल्लामा बीमा लागू हुने महीनाको अघिल्लो महीना बीमा गराउनेको चाप बढी हुने गरेको दाहालले जानकारी दिए ।
पाँच जनासम्मको परिवारले वार्षिक रु दुई हजार ५०० को स्वास्थ्य बीमा गरेपछि बिरामी परेका समयमा वार्षिक रु ५० हजारसम्मको स्वास्थ्य उपचार सेवा पाउने भएपछि स्थानीय यो कार्यक्रमप्रति आर्कषण बढेको हो । पाँचभन्दा बढी सदस्य भएको परिवारले स्वास्थ्य बीमा गर्न थप प्रतिव्यक्ति रु ४५० का दरले शुल्क बुझाउनुपर्छ । उपचार खर्च पनि रु ५० हजारमा प्रतिव्यक्ति थप १० हजारका दरले बढी सेवा पाउने व्यवस्था छ ।
Leave a Reply