हेल्थ टुडे,
सोलुखुम्बु,१ असारः जिल्लामा स्वास्थ्य बिमा गर्ने बिमितले बिमाबापतको सेवा लिन वर्षेनी नवीकरण गर्नुपर्ने भए पनि नवीकरण गर्नेको संख्या न्यून देखिएको छ। आर्थिक वर्ष २०७४–७५ मा सात सय ७० परिवारले बिमा गरेकोमा २०७५÷७६ मा ६५ परिवारले मात्र बिमा नवीकरण गरेका छन्। सेवाबिन्दु टाढा हुनु, गुणस्तरीय सेवा प्रवाह नहुनु र बिमाप्रति चेतना अभावले नवीकरणमा समस्या देखिएको हो । दुई आवको अवधिमा सोलुखुम्बुमा ३८ सयभन्दा बढीले स्वास्थ्य बिमा गरेका छन्।
२०७४ असोज २५ देखि २०७६ जेठसम्मको अवधिमा स्वास्थ्य बिमा गर्नेको संख्या ३ हजार आठ सय ३८ पुगेको हो। बीमितमध्ये एक हजार ९ सय ३५ महिला र एक हजार ९ सय तीनजना पुरुष रहेका छन्। सातओटा गाउँपालिका र एक नगरपालिका रहेको जिल्लामा खुम्बु पासाङल्हामु गाउँपालिकामा भने बिमा कार्यक्रम लागु हुन सकेको छैन। हालसम्म सोलुदुधकुण्ड नगरपालिकामा एक हजार चार सय १६ जना, नेचासल्यान गाउँपालिकामा पाँच सय ५९ जना र महाकुलुङ गाउँपालिकामा तीन सय ७४ जनाले स्वास्थ्य बिमा गरेका छन् ।
त्यस्तै, लिखुपिके गाउँपालिकामा तीन सय ८५, माप्यदूधकोसी गाउँपालिकामा दुई सय ७७, थुलुङ दूधकोसी गाउँपालिकामा तीन सय ९२ र सोताङ गाउँपालिकामा चार सय ३५ जनाले बिमा गरेका छन् । जनप्रतिनिधिको चासो कम हुनु र सेवाका लागि स्वास्थ्य संस्था नभएकाले पनि खुम्बु पासाङल्हामु गाउँपालिकामा भने बिमा कार्यक्रम सुरु हुन सकेको छैन ।
गत वैशाखदेखि लागू हुनेगरी सरकारले बिमा रकम वृद्धि गरेको छ। पाँच जनासम्मको परिवारको स्वास्थ्य बिमा गर्दा २५ सय तिर्दै आएका सर्वसाधारणले ३५ सय तिर्नुपर्नेछ। पाँचजना बाहेकमा सदस्य थप भए प्रतिसदस्य चार सय ५० बाट बढाएर सात सय पु¥याइएको छ। ५० लाखसम्मको स्वास्थ्य सेवाबाट वृद्धि गरी एक लाख र सदस्य थप हुँदा प्रतिसदस्य वृद्धि हुने २० हजार गरी अधिकतम दुई लाखसम्मको सेवा दिने व्यवस्था मिलाइएको छ।
Leave a Reply