हेल्थ टुडे,
काठमाडौं, ५ असार : नेपालमा पनि विभिन्न कार्यक्रमको आयोजना गरि असार ६ गते ( जुन २१ ) का दिन अन्तर्राष्ट्रि«य योग दिवस मनाइने भएको छ । हरेक वर्ष जुन २१ का दिन अन्तर्राष्ट्रिय योग दिवस मनाइने गरिन्छ । आयुर्वेद तथा बैकल्पिक चिकित्सा विभागले ५ औं रामशाहपथ स्थित स्वास्थ्य तथा जनसंख्या मन्त्रालयको प्राङ्गणमा विभिन्न योग अभ्यासका साथ मनाउने भएको छ । योग सम्बन्धी जनचेतना जगाएर स्वस्थ समाज निर्माण गर्ने हेतुले ‘ योग फर हार्मोनी एण्ड पीस’ भन्ने मूल नाराका साथ योग दिवस मनाउन लागिएको हो । उपप्रधानमन्त्री एवं स्वास्थ्य तथा जनसंख्या मन्त्री उपेन्द्र यादवको प्रमुख आथित्यमा उक्त योग दिवस मनाउन लागिएको आयुर्वेद तथा बैकल्पिक चिकित्सा विभागका महानिर्देशक डा. बाशुदेव उपाध्यायले जानकारी दिएका छन् । मेरो स्वास्थ्य, मेरो जिम्मेवारी भन्ने कथनलाई मनन् गरि योग र आयुर्वेद चिकित्सा पद्घतिले निर्देशित गरेको जिवनशैलीयापन गरेमा विभिन्न रोगको संक्रमण र उपचार खर्चबाट बच्न सकिने डा. उपाध्याय बताउछन् । नियमित योग अभ्यास गर्नाले र त्यसका नियम पालना गर्नाले नसर्ने रोगको राकथाममा महत्वपूर्ण भूमिका खेल्ने भएकाले योगलाई देश भरिनै बिस्तार गर्नु आवश्यक रहेको डा. उपाध्यायको भनाई छ । योग दिवसकै अवसरमा देशका अन्य आयुर्वेदिक स्वास्थ्य संस्था र सरोकारवालाहरुले पनि विभिन्न कार्यक्रमको आयोजना गरि योग दिवस मनाउने तयारी गरेका छन् ।
