हेल्थ टुडे,
काठमाडौ,६ असारः सरकारले ‘लागूऔषध दुरुपयोग एवम् ओसारपसारविरुद्ध सप्ताहव्यापी अभियान’ सुरु गरेको छ । अभियान अन्तर्गत देशभर लागूऔषध रोकथाम नीति र सो समस्या समाधानका लागि आवश्यक नीतिगत छलफल, गाजा तथा अफिम खेतीको फडानीलगायतका कार्यक्रम पनि समावेश गरिएको छ ।‘समृद्ध राष्ट्र निर्माणका लागि लागूऔषधरहित स्वास्थ जीवन’ भन्ने मूल नाराका साथ तय गरिएको सो सप्ताहव्यापी अभियान असार ११ गतेसम्म संचालन हुनेछ ।
लागूऔषध दुरुपयोग एवम् ओसारपसारविरुद्धको अन्तराष्ट्रिय दिवसको अवसरमा आयोजना गरिएको कार्यक्रममा गृह सचिव प्रेमकुमार राईले लागूऔषध दुरुपयोग एवम् ओसारपसार हुन नदिन आवश्यक जनचेतना फैल्याउने उद्देश्यका साथ देशभर विभिन्न २६ वटा कार्यक्रम तय गरी अभियानलाई अघि बढाइएको जानकारी दिए । उनले सरोकारवालाहरुको समन्वयमा सो कार्यक्रमलाई प्रभावकारी ढंगले संचालन गर्न प्रदेश सरकार र सम्बन्धित जिल्ला प्रशासन कार्यालयनलाई परिपत्र गरिएको बताए ।
नेपालमा हाल वर्षेनी ११ दशमलव ३६ प्रतिशतले लागू औषध प्रयोगकर्ताहरुको संख्यामा वृद्धि हुने गरेको सरकारी तथ्यांक छ । त्यसैगरी कूल अपराध मध्ये ७ प्रतिशत अपराध लागूऔषधसँग सम्बन्धित रहेका छन् । युवाहरु कूलतमा फस्ने क्रम बढेपछि सरकारले त्यसलाई नियन्त्रणमा लिन जनचेतनामूलक अभियान संचालन गरेको हो ।
Leave a Reply