हेल्थ टुडे,
धनगढी,२६ साउनः सूदुरपश्चिम प्रदेश सरकारले प्रदेशका ७ पहाडी जिल्लाका १६ निर्वाचन क्षेत्रका लागि अत्याधुनिक एम्बुलेन्स खरिद गरेको छ । हरेक निर्वाचन क्षेत्रको एउटा स्थानीय तहलाई मर्मत र चालकको व्यवस्था गर्ने गरी एम्बुलेन्स हस्तान्तरण हुने जनाइएको छ । सुदुरपश्चिम प्रदेशमा ‘बी ग्रेड’ को अहिलेसम्म एउटा पनि एम्बुलेन्स थिएन। प्रदेशमा ७ वटा पहाडी जिल्ला डडेल्धुरा, बैतडी, दार्चुला, बझाङ, अछाम, बाजुरा र डोटीमा प्रदेश सभाका १६ निर्वाचन क्षेत्र छन् । खरिद गरिएका एम्बुलेन्स दशैँ अगाडि सम्बन्धित संस्थालाई हस्तान्तरण गरिने जनाइएको छ ।
‘बी ग्रेड’ को एम्बुलेन्समा आकस्मिक उपचारका उपकरणसँगै ट्राभलिङ भेन्टिलेटर, अटोमेटेड एक्सटर्नल डिफ्राइब्रिलेटर, चेस्ट ड्रेनेज ट्युब, हेमो स्टेटिक सेटबाहेक ‘ए ग्रेड’का सबै उपकरण र सुविधा हुने जनाइएको छ । प्रदेशको सामाजिक विकास मन्त्रालयका अनुसार बाजुराको कोल्टी प्राथमिक स्वास्थ्य केन्द्र र टाटे स्वास्थ्य चौकी, दार्चुलाको हिकिला र खार, बैतडीको रुद्रेश्वर र कुलाउ, बझाङको मटेला र रायल तथा डडेल्धुराको भागेश्वर र नवदुर्गा स्वास्थ्य चौकीमा एम्बुलेन्स वितरण गरिने योजना छ ।
त्यस्तै, डोटीमा, जिल्ला अस्पताल र चमारा स्वास्थ्य चौकी, अछामको जिल्ला अस्पताल र बाब्ला स्वास्थ्य चौकीलाई संयुक्त रुपमा एक एम्बुलेन्स, अछामकै बान्नीगढी र विनायक स्वास्थ्य चौकीलाई पनि संयुक्तरुपमा एउटा एम्बुलेन्स हस्तान्तरण मन्त्रालयले जनाएको छ ।
प्रदेशको सामाजिक विकास मन्त्रालयले आर्थिक वर्ष २०७५–०७६ को बजेटमा एम्बुलेन्स खरिदका लागि ६ करोड २५ लाख रुपैयाँ विनियोजन गरेको थियो। सोहि बजेटबाट मन्त्रालयले १६ वटा एम्बुलेन्स खरिद गरेको छ । एम्बुलेन्स खरिद गरी यातायात व्यवस्था कार्यालयमा दर्ता प्रक्रिया समेत अघि बढेको छ ।
Leave a Reply