चिकित्सक संघको मत गणना भोली बिहान १० बजेदेखि

हेल्थ टुडे,
काठमाडौं, २१ माघ : डाक्टरहरुको छाता संगठन नेपाल चिकित्सक संघको नयाँ नेतृत्वकालागि भएको निर्वाचनको मत गणना भोली ( बुधबार ) बिहान १० बजेदेखि सुरु हुने भएको छ । दुई चरणमा भएको निर्वाचनमा ६ हजार एकसय ५२ मत खसेको छ । प्रमुख निर्वाचन आयुक्त डा. बाबुराम मरासिनीले बुधबार बिहान १० बजेदेखि मत गणना हुने जानकारी दिए । उपत्यकामा लगातार ५ दिनसम्म मतदान भएकाले गणनामा संलग्न हुनु पर्ने व्यक्तिहरु थाकेकाले राती आवश्यक गृहकार्य गरेर मत पेटिका बुधबार मात्र गणनाका लागि खोलिने बताए । मत गणना संघकै कार्यालयमा हुने छ । दुई चरणमा सम्पन्न निर्वाचनमा उपत्यका बाहिर दुई हजार आठ सय ५१ मत खसेको छ भने उपत्यकामा ३ हजार ३ सय १ मत खसेको छ । तिन वर्षे नेतृत्वका लागि लोकतान्त्रिक समूहबाट डा. लोचन कार्कीको समूह र समावेशी पेसागत समूहबाट डा. पुष्पमणी खराल नेतृत्वको समूहबिच प्रतिस्पर्धा रहेको छ । महासचिव र सदस्य पदमा स्वतन्त्र उम्मेदवारले पनि प्रतिस्पर्धा गरेका छन् । विसं २००७ सालमा स्थापना भएको संघको नेतृत्वमा अहिलेसम्म नेपाली कांग्रेस निकट चिकित्सकहरुले नेतृत्व गर्दै आइरहेका छन् । नेपाल चिकित्सक संघमा करिव १० हजार चिकित्सक सदस्य छ । मेडिकल काउन्सिलको रेकर्ड अनुसार करिव २५ हजार चिकित्सक दर्ता छन । ती मध्ये २० प्रतिसत बिदेशमा, १० प्रतिसतको मृत्यु भइसकेको र १० प्रतिसत अहिले पेसामा नभएको विज्ञहरु बताउछन । तर यसको कुनै आधिकारिक तथ्यांक भने छैन ।