कोरोनाबाट मृत्यु भएकी महिलाको नवजातशिशुसहित परिवारको रिपोर्ट नेगेटिभ

हेल्थ टुडे,

काठमाडौं, ५ जेठ : कोरोना संक्रमणका कारण मृत्यु भएको भनिएकी सिन्धुपाल्चोककी २९ वर्षीया सुत्केरी महिलाको १३ दिने शिशु र परिवारका अन्य सदस्यहरुको पीसीआर रिपोर्ट नेगेटिभ आएको छ । जेठ दुई गते राती मृत्यु भएकी ती महिलाको जेठ ३ गते धुलिखेल अस्पतालमा गरिएको कोरोना भाइरसको रिपोर्ट पोजेटिभ देखिएको थियो । त्यसपछि उनको मृत्यु कोरोनाका कारणले भएको सरकारले पुष्टि गरेको थियो । कोरोना संक्रमण पुष्टि भएपछि शिशुसहित मृतकको श्रीमान, माइतीतर्फको आमा र बहिनीको पनि नमुना संकलन गरिएको थियो ।
उनीहरुलाई १४ दिन क्वारेन्टाइनमा राखिने भएको छ । नतिजा नेगेटिभ आएपछि १४ दिन क्वारेन्टाइनमा राख्ने गरी सिन्धुपाल्चोकको प्रशासन र स्वास्थ्य कार्यलयको समन्वयमा पठाउन लागिएको जिल्ला कमाण्ड पोस्टका सदस्य एवं वरिष्ठ स्वास्थ्य प्रशासक डा. नरेन्द्रकुमार झाले जानकारी दिए । श्वासप्रस्वासमा समस्या आएपछि धुलिखेल अस्पताल ल्याउदै गर्दा बाह्रबिसे–९ निवासी ती सुत्केरीको जेठ २ गते राती मृत्यु भएको थियो । कोरोना संक्रमणको आशंकामा गरिएका आरडीटी र पीसीआर परीक्षणका रिपोर्ट शनिबार पोजिटिभ आएको थियो । त्यसपछि मृतकका श्रीमान, नवजात शिशु र परिवारको अन्य सदस्यहरुको पनि नमुना परीक्षण गरिएको थियो । धुलिखेल अस्पतालका प्रशासकीय निर्देशक डा. रमेश माकजूले शिशुसहित परिवारका सदस्यको रिपोर्ट आउन केही ढिलो भएको तर सबैको नेगेटिभ आएको बताए ।