हेल्थ टुडे,
काठमाडौं, ७ असोज : देशकै अग्रणी औषधि उत्पादक कम्पनी देउराली जनता फर्मास्यूटिकल्सले कोरोना संक्रमितको उपचारमा क्लिनिकल अध्ययनका लागि विश्वका धेरै देशले प्रयोग गरिरहेको फ्याभिपिराभिर नामक औषधिको उत्पादन सुरु गरेको छ । यो औषधिको उत्पादन सुरु गर्ने देउराली जनता पहिलो औषधि कम्पनी भएको उसको दाबी छ ।
स्वास्थ्य तथा जनसंख्या मन्त्रालय, औषधि व्यवस्था विभागबाट उत्पादनको अनुमति लिएर नेपालमा नै पहिलो पटक फाभिर २०० नाममा ट्याब्लेटका रुपमा उक्त औषधि उत्पादन गरेको देउराली जनताले बुधबार विज्ञप्ति मार्फत जानकारी दिएको छ । कोरोना भाइरसको उपचारका लागि क्लिनिकल अध्ययन प्रयोजनको लागि उपलब्ध गराउने गरी औषधि व्यवस्था विभागबाट यही असोज ६ गते स्वीकृति प्राप्त भएको हो ।
उक्त औषधि नेपाल स्वास्थ्य अनुसन्धान परिषदसँग विश्व स्वास्थ्य संगठनको प्रोटोकल अनुसार कोरोना संक्रमितको उपचारका लागि ‘इन्भेष्टिगेसनल ड्रग फर इमरजेन्सी युज’ (अत्यावश्यक प्रयोग गर्न) को अनुसन्धानका लागि क्लिनिकल अध्ययन गरी प्रभावकारिता कायम गर्न सहकार्यको तयारी भएको देउराली जनताले जनाएको छ । विषम परिस्थितिमा फाभिर–२०० नामक औषधिलाई नेपाली जनताको उपचारका लागि उपलब्ध गराउन नेपाल सरकारबाट माग वा निर्देशन भएकामा कोरोना संक्रमितको उपचारका लागि आवश्यक मात्रामा यो औषधि उपलब्ध गराउन कम्पनी तयार रहेको कम्पनीले जनाएको छ ।
