नयाँ संक्रमितको संख्या भन्दा निको हुनेको संख्या धेरै, बिगत २४ घण्टामा  ७ हजार २२६ संक्रमणमुक्त, १०६ जनाको मृत्यु

हेल्थ टुडे,

काठमाडौं, १३ जेठ :  नयाँ संक्रमितको संख्या भन्दा कोरोना संक्रमण मुक्त हुनेको संख्या बढेको छ । बिगत २४ घण्टामा कोरोना भाइरस संक्रमणमुक्त हुनेको संख्या ७ हजार २२६ रहेको छ भने ६ हजार ९३९ जनामा कोरोना संक्रमण देखिएको स्वास्थ्य तथा जनसंख्या मन्त्रालयले जनाएको छ ।

मन्त्रालयका अनुसार ६,९३९ जना नयाँ संक्रमित भेटिँदा ७,२२६ जना संक्रमणमुक्त भएका हुन् । २० हजार ४१४ पीसीआर परीक्षणमा ६,७३१ र ५७८ एन्टिजेन परीक्षणमा २०८ जना गरी पछिल्लो २४ घण्टामा ६,९३९ नयाँ संक्रमित भेटिएका हुन् ।

पछिल्लो २४ घण्टामा कोरोना भाइरस संक्रमणका कारण १०६ जनाको मृत्यु भएको मन्त्रालयले जनाएको छ । पछिल्ला दिनमा नयाँ संक्रमितको तुलनामा निको हुनेको संख्या बढ्दै गइरहेको छ ।