हेल्थ टुडे,
काठमाडौं, २३ जेठ : राष्ट्रपति विद्यादेवी भण्डारीले स्वास्थ्यकर्मी तथा स्वास्थ्य संस्थाको सुरक्षासम्बन्धी (पहिलो संशोधन) अध्यादेश जारी गरेकी छन् ।
सरकारको सिफारिसमा आइतबार उनले उक्त अध्यादेश जारी गरेकी हुन् । राष्ट्रपति भण्डारीले नेपालको संविधानको धारा ११४ को उपधारा (१) बमोजिम मन्त्रिपरिषद्को सिफारिसमा उक्त अध्यादेश जारी गरेको राष्ट्रपति कार्यालयले जनाएको छ । नेपाल चिकित्सक संघले उक्त कानून ल्याउन लामो समयदेखि माग गर्दै आइरहेको थियो ।
नेपाल चिकित्सक संघका अध्यक्ष डा. लोचन कार्कीले आफू संघको महासचिव भएकै बेला करिव ४ बर्ष अगाडिदेखि नै चिकित्सक सहित स्वास्थ्यकर्मी र स्वास्थ्य संस्थाको सुरक्षाका लागि कानूनको माग गर्दै आइरहेको परिणाम स्वरुप अहिले अध्यादेशका माध्यमबाट भए पनि कानून आएको बताए । उनले जारी अध्यादेशको पूर्ण कार्यन्वयन हुनु पर्ने बताए ।
अस्पतालमा स्वास्थ्यकर्मीमाथि आक्रमणका घट्ना बढेपछि सरकारले त्यसलाई नियन्त्रण गर्न यो अध्यादेश ल्याएको बताइएको छ । अध्यादेशले स्वास्थ्यकर्मी र स्वास्थ्य संस्थामाथि आक्रमण गर्नेमाथि तत्काल कारवाही अगाडि बढ्ने व्यवस्था गरिएको छ ।
