हेल्थ टुडे,
काठमाडौं,२४ साउन : शेरबहादुर देउवा नेतृत्वको संयुक्त सरकारले न्यूनतम साझा कार्यक्रम सार्वजनिक गरेको छ । गठबन्धनमा आबद्ध शीर्ष नेताहरुको उपस्थितिमा आइतबार प्रधानमन्त्री तथा मन्त्रिपरिषद् कार्यालयमा आयोजित पत्रकार सम्मेलनमा सार्वजजिक गरिएको सरकारको न्यूनतम साझा कार्यक्रममा नागरिकको स्वास्थ्यलाई पहिलो प्राथमिकता दिइएको छ ।
सरकारको न्यूनतम साझा कार्याक्रमको पहिलो प्राथमिकतामा कोरोनाको महामारीमा नागरिकको जिवनरक्षालाई राखेको छ । सरकारका ११ वटा प्राथमिकतामध्ये पहिलोे प्राथमिकता कोरोना महामारीबाट आक्रान्त नागरिकलाई असोजसम्म एक तिहाई र चैत मसान्तसम्म खोप लगाउन योग्य सबै नागरिकलाई निशुल्क खोपको व्यवस्था गर्ने रहेको छ । त्यसैगरि स्वदेशमै खोप उत्पादन गर्नका लागि नेपालमा भ्याक्सिन ल्याव स्थापनाका लागि पहल गर्ने, कोरोनाको तेश्रो लहरको संभावित जोखिमबाट बच्न पूर्व तयारी गर्ने र गत वर्ष कोरोना महामारीका बेला स्वास्थ्य सामग्रीमा भएको अनियमितताको छानविन गरि दोषीहरुमाथि कारवाही गर्ने कुरा पनि कार्यक्रममा प्राथमिकताका साथ जोड दिइएको छ । पूर्व स्वास्थ्य तथा जनसंख्या मन्त्री भानुभक्त ढकालको कार्यकालमा कोरोना रोकथामका लागि ल्याइएको स्वास्थ्य सामग्रीमा व्यापक अनियमितता भएको आशंका गरिएको छ । व्यापक अनियमितताको आंशका गरिए पछि पूर्व प्रधानमन्त्री केपी ओलीले स्वास्थ्य सामग्री खरिद गर्ने जिम्मा स्वास्थ्यबाट छिनेर नेपाली सेनालाई दिने भन्दै ढकाललाई चोख्याउन खोजेका थिए । केही समयपछि ओलीले ढकाललाई स्वास्थ्य मन्त्रालयबाट सरुवा गरि पर्यटन मन्त्रालय पुर्याएका थिए ।
