हेल्थ टुडे,
काठमाडौं, १ असोज : कोरोना महामारीका कारण परिवार नियोजन सेवा प्रवाहमा समस्या देखिएको सरोकारवालाले बताएका छन् । आठौं परिवार नियोजन दिवस एवं नेपाल परिवार नियोजन संघको ६३ औं बार्षिकोत्सवको अवसरमा शुक्रबार परिवार नियोजन संघले आयोजना गरेको कार्यक्रममा सरोकारवालाहरुले कोरोना महामारीका कारण परिवार नियोजन सेवा प्रभावित भएको दाबी गर्दै भविश्यमा प्रभावकारी ढंगले सेवा प्रदान गर्ने बताएका छन् ।
स्वास्थ्य तथा जनसंख्या मन्त्रालय, परिवार कल्याण महासाखाका निर्देशक डा. विवेकलाल कर्णले कोरोना महामारीका कारण सरकारले चाहेर पनि सहज रुपले परिवार नियोजन सेवा प्रदान गर्न नसकेको बताए । पछिल्ला दिनमा कोरोना भाइरसको संक्रमण घट्दै गएकोले बिस्तारै परिवार नियोजन सेवा सहज हुदै जाने डा. कर्णको विश्वास छ । महामारीका कारण परिवार नियोजनको बजेट घट्दै गएको जानकारी दिदै डा. कर्णले बजेट बढाउनु पर्ने आवश्यकतामा जोड दिए ।
परिवार कल्याण महासाखा, परिवार नियोजन तथा प्रजनन् स्वास्थ्य साखा प्रमुख कविता अर्याल (भट्ट)ले परिवार नियोजन सेवाको पहूँच नभएका समुदायलाई सेवाको पहूँच सुनिश्चित गर्न सरकारो ध्यान केन्द्रित रहेको बताइन । सरकारले परिवार नियोजन सहित अधिकांस यौन तथा प्रजनन् सेवा निशुल्क गरेको भए पनि सूचना अभावमा सबै समुदायले सेवा लिन नसकिरहेको अर्यालको भनाई थियो ।
कार्यक्रममा ब्लाइन्ड युथ एसोसिएसनका अध्यक्ष कलाधर भण्डारी, एचआईभी संक्रमितहरुको महासंघ (एनएपीएन) का अध्यक्ष राजेश ददिया, जागृति महिला महासंघकी कार्यकारी निर्देशक बिजया ढाकाल र दृष्टि नेपालकी अध्यक्ष परिना सुव्वाले परिवार नियोजनको सेवा लिदा विभेद हुने गरेको बताउदै त्यसलाई सबैको समान पहूचमा ल्याउनु आवश्यकता रहेको बताएक थिए ।
परिवार नियोजन संघका अध्यक्ष हिमालय लाल कसजू र संघका कार्यकारी प्रशासक डा. नरेश प्रताप केसीले सरकार र गैरसरकारी संस्थाको संयुक्त साझेदारीबाट मात्र सबै समुदायसम्म परिवार नियोजन सेवा पुर्याउन सकिनेमा जोड दिए । कार्यक्रममा नेपाल परिवार नियोजन संघका कार्यक्रम निर्देशक सुभाष श्रेष्ठले संघले गरिरहेका सेवाका बिषयमा जानकारी गराएका थिए ।
