परीक्षण गरिएका मध्ये ४५ प्रतिशतमा कोरोना संक्रमण, एकैदिन देशभरि १० हजारलाई कोरोना पुष्टि

हेल्थ टुडे,
काठमाडौं, ४ माघ : नेपालमा पछिल्ला दिन कोरोना संक्रमितको संख्या ह्वात्तै बढ्न थालेको छ । पछिल्लो २४ घण्टामा देशभर १० हजार भन्दा बढीमा कोरोना भाइरस संक्रमण पुष्टि भएको छ । निकै संक्रामक मानिएको ओमोक्रन भेरियन्ट फैलिएसँगै देशभर दैनिक संक्रमितको संख्या बढिरहेको हो ।
स्वास्थ्य मन्त्रालयका अनुसार एकैदिन २२ हजार ८२८ जनाको परीक्षण गर्दा १० हजार २५४ जनामा संक्रमण देखिएको हो । कुल परीक्षण गरिएको मध्ये ४४.९३ प्रतिशतमा संक्रमण देखिएको हो ।

सोमवार भने १७ हजार ४६५ जनाको कोरोना परीक्षण गर्दा ६ हजार ७३४ जनामा कोरोना भाइरस संक्रमण पुष्टि भएको थियो। यस्तै, ५६२ जना संक्रमण मुक्त हुँदा हाल देशभर सक्रिय कोरोना संक्रमितको संख्या ३९ हजार ४४ पुगेको छ । संक्रमण बढेसँगै सरकारले खोपलाई तिब्रता दिएको छ । सार्वजनिक स्थलमा समेत हिडडुल गर्दा माघ ७ देखि खोप कार्ड देखाउनु पर्ने नियम बनाएको छ ।

संक्रमणका कारण थप एक जनाको मृत्यु भएको छ। हालसम्म देशभर ११ हजार ६२४ जनाको मृत्यु भइसकेको छ। मन्त्रालयका अनुसार पछिल्लो २४ घण्टामा २ लाख १३ हजार १४८ जनाले कोभिड १९ विरुद्ध खोप लगाएका छन् ।