एजेन्सी,
नयाँ दिल्ली, १६ माघ : ओमिक्रोन भेरियन्टको संक्रमणमा कमि आएसँगै भारतमा जनजीवन सहज बन्न थालेको छ । कतिपय राज्यले प्रतिवन्ध फुकुवा गरेका छन् भने कतिले लकडाउन हटाएका छन् । भारतीय सञ्चारमाध्यमहरुले जनाए अनुसार कर्नाटक राज्यले सोमबारदेखि लागु हुने गरि रात्रिकालिन कफर््यु हटाएको छ । त्यसै सिनेमा हल बाहेक होटल, बार र क्लवमा ५० जना मात्र भेला हुन पाउने नियम हटाएको छ । बैंग्लोरमा सोमबारदेखि नै विद्यालयले भौतिक उपस्थितिमा पठनपाठन सुरु गर्ने भएका छन् । सरकारी कार्यालयहरु समेत पूर्ण क्षमताका साथ सञ्चालन हुने जनाइएको छ ।
नयाँ दिल्ली राज्यमा अधिकांश सेवा सञ्चालनमा आइसकेका छन् । ३ हप्तापछि दिल्लीमा जोर बिजोर हटाइएको छ भने कर्फ्यु पनि हटाइएको छ । तर विद्यालय बन्द र रात्रिकालिन कर्फ्यु भने यथावत छ । सरकारी कार्यालयमा ५० प्रतिसत कर्मचारी मार्फत काम भइरहेको छ । भारतमा दैनिक संक्रमण हुनेको संख्या पछिल्ला दिनमा घट्दै गइरहेको छ । भारतको स्वास्थ्य तथा परिवार कल्याण मन्त्रालयका अनुसार अहिले २० लाख ४ हजार जना कोरोना संक्रमित छन् । भारतीय अधिकारीहरुका अनुसार पछिल्ला केही दिनमा नयाँ संक्रमण हुनेको संख्या भन्दा निको हुनेको संख्या बढ्दै गइरहेको छ । पछिल्ला २४ घण्टामा भारतमा ३ लाख ३५ हजार संक्रमण मुक्त भएका छन् ।
