हेल्थ टुडे,
काठमाडौं, १२ चैत : डायबिटिज (मधुमेह) रोकथाम र उपचारका क्षेत्रमा उल्लेख्य योगदान गरेको भन्दै डायबिटिज नेपालले डा.सन्जिव ढुङ्गेललाई ‘डायबिटिज लाइफटाइम अवार्ड’ बाट सम्मानित गरेको छ । डायबिटिज नेपालको आयोजनामा शनिबार राजधानीमा भएको इन्डो –नेपाल – युके डायबिटिजको संयुक्त बैठकको शुभारम्भको अवसरमा स्वास्थ्य तथा जनसंख्या मन्त्री विरोध खतिवडाले डा. ढुङ्गेललाई डायबिटिज लाइफटाइम अवार्डबाट सम्मानित गरेका हुन ।
डा. ढुङ्गेल लामो समय त्रिवि शिक्षण अस्पताल, नेपाल मेडिकल कलेज लगायतका स्वास्थ्य संस्थामा रहेका डायबिटिज (मधुमेह) का क्षेत्रमा कार्य गर्दै आइरहेका छन् । कार्यक्रममा नेपाल, भारत र बेलायतका मधुमेह नियन्त्रण र उपचारका क्षेत्रमा कार्यरत विज्ञहरु सहभागी छन् ।
उद्घाटन कार्यक्रममा बोल्दै स्वास्थ्य तथा जनसंख्या मन्त्री खतिवडाले पछिल्ला दिनमा नसर्ने रोगहरुको संक्रमण नपत्याउदो किसिमले बढी रहेको बताउदै मधुमेहको नियन्त्रणका लागि जनचेतना बिस्तार गर्नु पर्नेमा जोड दिदै डायबिटिज नेपालले यो क्षेत्रमा गरिरहेको कामको प्रशंसा गरे । गत महिना वीर अस्पतालमा जाच गराउदा आफुलाई पनि मधुमेहको छोइसकेको पत्ता लागेपछि औषधि खान थालेको बताउदै मन्त्री खतिवडाले मधुमेहबाट बच्ने उपायका बिषयमा व्यापक रुपमा जनचेतना जगाउने काममा अगाडि बढ्न सरकार तयार रहेको बताए ।
कार्यक्रममा डायबिटिज नेपालका अध्यक्ष रोशन कृष्ण न्याछ्योंले डायबिटिज नेपालले कोरोना संक्रमणका बेला पनि विभिन्न दातृ निकायको सहकार्यमा समस्यामा परेका नेपालीहरुलाई सक्दो सहयोग गरेको बताउदै मधुमेह मुक्त समाज निर्माणका संस्थाले भविश्यमा पनि आफ्ना अभियान जारी राख्ने बताए । कार्यक्रममा कैलाश प्रधान, सतिन्द्र राजभण्डारी लगायतका मधुमेहको बढ्दो संक्रमण न्युनिकारण गर्न सबैको सहकार्य आवश्यक रहेको बताए । शनिबार चल्ने बैठकमा मधुमेहका बिषयमा विभिन्न विज्ञहरुले कार्यपत्र प्रस्तुत गर्ने कार्यक्रम रहेको छ ।
