बच्चाको आँखामा देखिने समस्या के के हुन् ?

काठमाडाैं, २७ बैसाखः बालबालिकामा आँखामा विभिन्न समस्या देखिन्छन् र कोरोना संक्रमणका कारण विगत दुई वर्ष लकडाउन हुँदा अधिकांश बालबालिकामा दृष्टिदोषको समस्या बढेको पाइन्छ ।
दृष्टिदोष भनेको टाढाको र नजिकको चिज देख्न नसक्ने अवस्था हो । टाढाको चिज देख्न नसक्नुलाई दूर दृृष्टिदोष र नजिकको नदेख्ने अवस्थालाई अदूरदृष्टि दोष भनिन्छ । गत दुई वर्षमा अधिकांश बच्चा घर बाहिर जान पाएनन् । घरभित्रै थुनिएर बस्नु पर्दा उनीहरूको खेल्ने वा समय बिताउने साधन नै ल्यापटप मोबाइल वा ट्र्याप भए । स्कुल पनि अनलाइन भएकाले धेरै समय कम्प्युटरमा स्क्रिनमा हेर्नु प¥यो । जसका कारण ठूलो संख्यामा स्कुल बालबालिकाको आँखाको ज्योतिमा ठूलो समस्या देखिएको छ ।
त्यसैगरी एउटा वा दुवै आँखाले कम देख्ने समस्या पनि बच्चाहरूमा हुन्छ । यस्तो अवस्थालाई अल्छी आँखा भनिन्छ । यस्तो अवस्थालाई भविष्यमा यसले दृष्टिविहीन अवस्था पनि ल्याउन सक्छ । अल्छी आँखा भएको व्यक्तिको आँखाको दृष्टि नर्मलभन्दा कम हुन्छ ।
यसका अलावा बालबालिकामा मौसमी रोग पनि हुन्छन् । भाइरल रुघा वा संक्रमणका कारण आँखा पाक्नेसम्मको समस्या आउँछ । गर्मी मौसममा एलर्जी हुने समस्या पनि उत्तिकै हुन्छ । कसैकसैमा आँखामा आँसु कम हुने समस्या पनि देखिन्छ । आँखा सुक्खा भएपछि पनि आँखामा दृष्टि कम हुन्छ ।
५० वर्षपछि मात्र मोतीबिन्दु हुन्छ भने मान्यता छ । तर त्यसो होइन जन्मजात नै पनि मोतीबिन्दु हुने सक्छ ।
त्यसैले बालबालिकाको आँखा जोगाउनु आमाबुवाको पनि जिम्मेवारी हो ।
दृष्टिदोषबाट बचाउन बच्चालाई चाहिनेभन्दा बढी समय मोबाइल, ल्यापटपजस्ता इलेक्ट्रिक चिज दिनु हुँदैन ।
हरेक दिन बिहान कम्तीमा पनि आधा घण्टा घाममा बसाउनु पर्छ । यसबाट भिटामिन ‘डी’ को कमी पूर्ति गर्न सकिन्छ ।
यसका साथै हरियो सागसब्जी, पहेँला फलफूल, माछामासु खुवाउनु पर्छ । जंगफुडबाट टाढा राख्नुपर्छ । आमाको दूध कम्तीमा पनि एक वर्षसम्म खुवाउनु पर्छ । दृष्टिदोषको समयमा उपचार गरेनौं भने सधैंका लागि दृष्टिविहीन हुने भएकाले समयमा बालनेत्रविज्ञकहाँ जानुपर्छ । ६÷६ महिनामा आँखा जाँच गराउनु पर्छ ।