हेल्थ टुडे,
काठमाडौं, ३१ भदौ : नेपाल अर्बुद रोग निवारण संस्थाले आफ्नो स्थापनाको ४० औं बार्षिकोत्सव मनाएको छ । शुक्रबार राजधानीमा एक कार्यक्रमको आयोजना गरि संस्थाले बार्षिकोत्सव मनाएको हो । कार्यक्रममा संस्थाका पूर्व अध्यक्ष एवं संस्थापक कर्ण शाक्यले काठमाडौं महानगरपालिकाले असोज १ गतेदेखि महानगरपालिकाको सार्वजनिक स्थलमा धूम्रपान र सूर्तिजन्य पदार्थ सेवन गर्न नपाइने निर्णयको स्वागत गर्दै त्यसलाई व्यवहारमा उतार्न संस्थाले सक्दो सहयोग गर्ने बताए ।
सूर्तिजन्य पदार्थ सम्बन्धी ऐनमा सार्वजनिक स्थलमा सूर्तिजन्य पदार्थको सेवन गर्न नपाइने व्यवस्था गरे पनि व्यवहारमा उक्त कानूनको कार्यन्वयन एकदमै फितलो छ । पूर्व अध्यक्ष शाक्यले सूर्तिजन्य पदार्थको सेवन न्यून गर्न जनचेतना बिस्तार गर्नु पर्ने आवश्यकता अहिले पनि उत्तिकै रहेको बताए । क्यान्सरले ३९ वर्ष पहिले ३ महिनाको अन्तरालमा आफूले पत्नी र छोरी गुमाउदा सरकारलाई क्यान्सर अस्पताल खोल्न आग्रह गर्दा नमानेको स्मरण गर्दै अहिले पनि क्षयरोगको उपचारमा विदेशी सहयोग आइरहेको तर भयाभव रुपमा फैलिइरहेको क्यान्सरको उपचारका लागि सहयोग नहुनु दुखद भएको बताए ।
एक चुरोट बराबर एक पैसा अन्त शुल्क लिएर स्वास्थ्य कर उठाउनु पर्छ र त्यो रकम क्यान्सर विरामीको उपचार तथा जनचेतना बिस्तारमा खर्च गर्नु पर्छ भन्ने आफ्नो प्रस्ताव सरकारले मानेर अन्तशुल्क उठाइरहको भए पनि संकलित रकमको सही सदुपयोग हुन नसकेको शाक्यले बताए । कार्यक्रममा पूर्व मन्त्री गणेश शाहले राजनीतिक दलका आमशभाहरुमा चुरोट तथा सूर्ति निषेध गर्नु पर्ने बताए । नेपाल विकास अनुसन्धान प्रतिष्ठानका कार्यकारी डा. जय गुरुङले संस्थाले ४० वर्षमा उदाहरणिय काम गरेको बताए । संस्थाका अध्यक्ष महेश श्रेष्ठले सूर्तिजन्य पदार्थ नियन्त्रणमा सबैको सहकार्य आवश्यक रहेको बताए । कार्यक्रममा विभिन्न विधाका व्यक्ति एवं संस्थाहरुलाई सम्मान समेत गरिएको थियो ।
