वरिष्ठ स्त्री रोग विज्ञ डा. चन्दा कार्कीलाई संसदको ढोका खुल्यो

पदमराज जोशी,
काठमाडौं, २५ मंसिर : वरिष्ठ स्त्री तथा प्रसूतिरोग विज्ञ प्रा. डा. चन्दा कार्कीका लागि संसदको ढोका खुलेको छ । राष्ट्रिय स्वतन्त्र पार्टीले समानुपातिकमा डा. कार्कीको नाम सांसदको रुपमा समावेश गरेर अन्तिम नामावली निर्वाचन आयोगमा बुझाए पछि उनको लागि संसदको ढोका खुल्ला भएको हो ।
राष्ट्रिय स्वतन्त्र पार्टीले डा. कार्कीको नाम समानुपातिकमा राखेको भएपनि शनिबारसम्म डा. कार्कीलाई समानुपातिक सांसद बनाउने वा नबनाउनेमा पार्टीमा विवाद थियो । अन्तिममा पार्टीले मेरिट अनुसार नै समानुपातिक सांसद छान्ने निर्णय गरे पछि कार्की सभासद हुने पक्का भएको हो । निर्वाचन आयोगले सोमबार समानुपातिक सांसदहरुको अन्तिम नामावली सार्वजनिक गर्ने तयारी गरेको छ ।
बिस २०१५ सालमा महोत्तरीको ओरहीमा जन्मिएकी डा. चन्दाले १५ वर्ष सरकारी सेवामा काम गरेर निजी क्षेत्रको काठमाडौं मेडिकल कलेजमा संलग्न भएकी थिइन । सन् २००० देखि २०२० सम्म २० वर्ष काठमाडौं मेडिकल कलेजमा विभिन्न जिम्मेवारी सम्हाल्दै कलेजको प्रिन्सिपल हुनु भएकी डा. चन्दा कुशल स्त्री तथा प्रसूति रोग विज्ञका रुपमा परिचित छन् ।
डा. चन्दाका पति डा. टेकेन्द्र कार्की पनि चिकित्सा पेसामै संलग्न छन् । सांंसद बन्ने ढोका खुलेपछि प्रतिकृया दिदै डा. चन्दाले स्वास्थ्य क्षेत्रको सुधारका लागि आफु लाग्ने विश्वास व्यक्त गरेकी छन् ।