मधेश स्वास्थ्य निर्देशनालयको प्रमुखमा डा. नायकको पदस्थापन

हेल्थ टुडे,
जनकपुरधाम, २८ कात्तिक : मधेश स्वास्थ्य निर्देशनालयको प्रमुखमा डा. श्रवणकुमार नायकलाई पदस्थापन गरिएको छ । बढुवाको झण्डै एक वर्षपछि डा.नायकलाई मधेश सरकारले पदस्थापन गरेको छ ।
मधेश सरकारको सोमबार बसेको मन्त्रिपरिषदको बैठकले एघारौं तहमा बढुवा भएका डा. नायकलाई मधेश स्वास्थ्य निर्देशनालयको प्रमुखमा पदस्थापन गर्ने निर्णय गरेको हो । सो निर्णय बमोजिम मुख्यमन्त्री कार्यालयले उनलाई मंगबार निर्देशनालय प्रमुखमा पदस्थापन गरेको हो । आफ्नो आज निर्देशनालयको प्रमुख पदमा पदस्थापन भएको र पत्र बुझ्न आधिकारिक जानकारी आएको नायकले बताए । लामो संघर्ष र मिहिनेतपछि आफूले न्याय पाएको उनको भनाइ छ ।
स्वास्थ्य सेवा समूह हेल्थ इन्स्पेक्सन एघारौं तहका नायकको दरबन्दी भएको कार्यालय मधेश स्वास्थ्य निर्देशनालय नै हो ।
स्वास्थ्य सेवाको एघारौं तहमा बढुवा भएका नायकलाई झण्डै ५ महिनादेखि मुख्यमन्त्री कार्यालयमा तलबभत्ता खाने गरी सरकारले थन्काएको थियो । बढुवाको ७ महिनासम्म स्वास्थ्य निर्देशनालयका वरिष्ठ जनस्वास्थ्य प्रशासक डा. नायकले आफूभन्दा कनिष्ट डा. राजीवकुमार झा मातहतमा काम गर्नु परेको थियो ।