कैलालीका युवक पनि कोरोना संक्रमणबाट निको भएर घर फर्के

हेल्थ टुडे,
कैलाली, ७ वैशाख: सुदूरपश्चिमको सेती प्रादेशिक अस्पताल धनगढीमा उपचाररत २१ बर्षिय कोरोना संक्रमित युवक निको भएर आज घर फर्केका छन । कैलालीको लम्कीचुहा नगरपालिका–९ प्रतापपुरका २१ बर्षिय युवकको दोस्रो र तेस्रो पटक गरिएको कोरोना संक्रमण परिक्षणको नतिजा नेगेटिभ आएपछि उनलाई आजै अस्पतालले डिस्चार्ज गरेको हो ।
पहिलो रिपोर्ट पोजेटिभ आएपछि अस्पताल भर्ना भएका उनको दोस्रो र तेस्रो रिपोर्ट नेगेटिभ आएपछि डिस्चार्ज गरिएको अस्पतालमा प्रवक्ता डा. जगदीश जोशीले बताए । भारतबाट चैत ११ गते घर फर्किएका उनलाई कैलालीको प्रतापपुर क्वारेन्टाइनमा ११ दिन बसेपछि कोरोना पुष्टि भएको थियो । नगरपालिकाले तयार गरेको क्वारेन्टाइनमा उनी १३ गतेदेखि बसेका थिए । ११ दिन क्वारेन्टाइनमा र १३ दिन आइसोलेसन बसेका उनी घर फर्केका हुन । चैत २२ गते नमुना परिक्षण गर्दा कोरोना पोजेटिभ देखिए पछि उनलाई उपचारका लागि अस्पताल भर्ना गरिएको थियो । नेपालमा कोरोना संक्रमण भएर निको भएका उनी चौथो व्यक्ति हुन । हिजो मात्र काठमाडौं र बाग्लुडबाट दुई जनालाई डिस्चार्ज गरिएको थियो । सेती प्रादेशिक अस्पतालमा अब ४ जना कोरोना संक्रमितको उपचार भइरहको छ ।