हेल्थटुडे,
काठमाडौं, श्रावण ३० : राजधानीको महाराजगन्जस्थित त्रिवि शिक्षण अस्पतालमा थप ८ जना स्वास्थ्यकर्मीमा कोरोना संक्रमण पुष्टि भएको छ ।
अस्पतालका कोभिड–१९ व्यवस्थापन समितिका संयोजक डा. सन्तकुमार दासले शुक्रबार आएको रिपोर्टमा बिहान ४ र अहिले दिउँसो ४ जना गरी ८ जना स्वास्थ्यकर्मीलाई संक्रमण देखिएको जानकारी दिए । संक्रमितमा १ जना चिकित्सक र अरु ७ जना नर्स रहेको उनले बताए ।
त्रिवि शिक्षण अस्पतालमा संक्रमित हुने स्वास्थ्यकर्मीको संख्या २६ पुगेको छ। जसमध्ये ४ जना जति होम आइसोलेसनमा बसेका छन् । बुधबार मात्रै आकस्मिक सेवा विभागका २ चिकित्सक र ४ जना नर्समा कोरोना संक्रमण देखिएको थियो । दासका अनुसार अधिकांशमा कोरोनाका लक्षण रहेका छन् । आकस्मिक सेवा विभागका सय भन्दा स्वास्थकर्मीको कोरोना परीक्षणका लागि स्वाब संकलन गरिएको छ भने परीक्षणपश्चात मात्र आकस्मिक कक्ष खोल्ने डा दासले जानकारी गराए । पछिल्ला दिनमा अस्पतालमा कार्यरत चिकित्सक र स्वासथ्यकर्मीलाई नै कोरोना संक्रमण देखिन थालेपछि स्वास्थ्य सेवा प्रभावित हुन थालेको छ ।
