निको हुने दर बढ्यो, एक लाख ८८ हजार कोरोना संक्रमित मध्ये १ लाख ५२ हजार निको भए

हेल्थ टुडे,

काठमाडौं, २२ कात्तिक :  नेपालमा पछिल्ला दिनमा कोरोना संक्रमितको निको हुने दर बढ्दै गइरहेको छ । स्वास्थ्य तथा जनसंख्या मन्त्रालयका अनुसार देशभरिमा कुल संक्रमितको संख्या एक लाख ८८ हजार ८८३ मध्ये एकलाख ५२ हजार ९०८ निको भएर घर फर्किसकेका छन् । मन्त्रालयका अनुसार ८० प्रतिसत संक्रमित निको भएका छन ।

निको हुने दर बढ्दै जानु सकारात्मक रहेको विज्ञहरुले बताएका छन् । यो दर अझै बढ्नु आवश्यक रहेको सरुवारोग विज्ञ एवं इपिडिमियोलोजी तथा रोग नियन्त्रण महासाखाका निर्देशक डा. वाशुदेब पाण्डेले बताए । निको हुने दर कम हुनु चिन्ताको बिषय हुने भएकाले निको हुनेको संख्या बढ्नु राम्रो भएको उनको भनाई छ । शुक्रबार ४ हजार ५ सय जना कोरोना संक्रमित डिस्चार्ज भएका छन् । मन्त्रालयका अनुसार शुक्रबार २ हजार ९०९जना थप संक्रमित फेला परेका छन् । अहिलेसम्म पीसिआर विधिबाट कोरोना परीक्षण गराइएका १५ लाख १७ हजार ३४३ मध्ये ३४ हजार ९०५ जना सक्रिय संक्रमित छन् ।

पछिल्ला दिन लक्षण सहितका संक्रमितको संख्या बढ्दै गइरहेको पाइएको छ । नेपालका अस्पतालहरुका सिमित संख्यामा रहेका आईसियू र भेन्टिलेटर सहितके सुविधा भएका शैय्याका कारण जटिल संक्रमितहरुले समेत अस्पतालमा शैय्या नपाउने अवस्था सिर्जना भएको छ । स्वास्थ्य तथा जनसंख्या मन्त्रालयले समयमै महामारीको सही आकलन र त्यही अनुसार व्यवस्थापन गर्न नसक्दा समस्या बढ्दै गइरहेको विज्ञहरुले बताएका छन् ।