हेल्थ टुडे,
काठमाडौं, १३ चैत : नेपाल नेत्रज्योति संघले देशका ७५३ वटै पालिकामा आँखा सेवा बिस्तार गर्ने योजना बनाएको छ । त्यसका लागि प्रत्येक वर्ष सरकारले कम्तिमा पनि १० वटा पालिकामा आँखा उपचार केन्द्र स्थापना गर्न बजेटको व्यवस्था गरिदिन आग्रह गरेको छ ।
४४ औं नेत्रज्योति संघ दिवसको अवसरमा आईतबार राजधानीमा आयोजित कार्यक्रममा नेपाल नेत्रज्योति संघका अध्यक्ष प्रा.डा. चेतराज पन्तले अहिले नेत्रज्योति संघ मार्फत मेचीदेखि महाकालीसम्म २७ वटा आँखा अस्पताल र १४४ वटा आँखा उपचार केन्द्र सञ्चालनमा रहेको बताउँदै देशका ७५३ वटै पालिकाहरुमा आँखा उपचार केन्द्र स्थापना गर्ने गरि संघ अगाडि बढेको बताए । उनले भने, ‘ त्यसका लागि सरकारले हरेक वर्ष कम्तिमा १० वटा आँखा उपचार केन्द्र स्थापनाका लागि बजेटको व्यवस्था गरिदिनु पर्छ । ’ २०७२ सालसम्म सरकारले हरेक वर्ष ५ वटा आँखा उपचार केन्द्र स्थापनाका लागि बजेट विनियोजन गरिदिने गरेकोमा भूकम्पपछि त्यो क्रम छुटेको स्मरण गर्दै डा. पन्तले अव त्यसलाई निरन्तरता दिदै हरेक वर्ष कम्तिमा पनि १० वटा पालिकामा आँखा सेवा पुर्याउन सरकारले बजेटको व्यवस्था गरिदिन आग्रह गरे ।
कार्यक्रममा स्वास्थ्य तथा जनसंख्या मन्त्री विरोध खतिवडाले आँखा सेवामा सरकारले गर्न नसकेको काम नेत्रज्योति संघले गरिरहेकोमा प्रसंशा गर्दै सरकारले आँखा सेवा बिस्तारमा हातेमालो गर्न चाहेको बताए । आँखा सेवा बिस्तारमा केन्द्र सरकारसँगै प्रदेश सरकार र स्थानिय सरकारले पनि आवश्यक बजेट व्यवस्था गरेर नेत्रज्योति संघलाई सहयोग गर्नु पर्नेमा मन्त्री खतिवडाले जोड दिए । स्वासथ्य तथा जनसंख्या मन्त्रालयका सचिव डा. रोषन पोखरेलले नेपाल सरकार आफैले आँखा उपचार सेवा प्रदान गर्न नसकिरहेको अवस्थामा नेत्रज्योति संघले आँखा उपचारका साथै अन्धोपन न्युनिकरणमा ठूलो योगदान गरेको बताए । उनले सरकारले नेत्रज्योति संघको सहकार्यमा प्रत्येक जिल्ला अस्पतालमा आँखा सेवा पनि सञ्चालन गर्न लागिएको जानकारी दिए ।
नेपाल नेत्रज्योति संघका महासचिव भरतबहादुर चन्दले ट्रकोमा निवारण गर्ने दक्षिण एशियाली देशहरुमध्ये नेपाल पहिलो देशको रुपमा विश्व स्वास्थ्य संगठनबाट सम्मानित हुनु ठूलो उपलब्धी भएको बताउदै हजारौ व्यक्तिमा दृष्टिविहिनताको समस्या रहेकाले आँखा स्वास्थ्यमा लगानी बढाउन सरकारलाई आग्रह गरे ।
कार्यक्रममा नेत्रज्योति संघका कार्यकारी निर्देशक डा. सैलेशकुमार मिश्रले संघमार्फत सञ्चालनमा रहेका आँखा अस्पताल र उपचार केन्द्रहरुले गत वर्ष मात्र ३३ लाखको आँखाको उपचार र २ लाख ६५ हजारको शल्यक्रिया गरेको जानकारी दिए । अस्पताल बाहेक बर्षमा ३ हजार आँखा सिविर सञ्चालन गरेर लाखौ नेपालीलाई आँखा सेवा उपलब्ध गराएको डा. मिश्रले बताए ।
कार्यक्रममा आँखा स्वास्थ्यमा उल्लेख्य योगदान गरेको भन्दै गण्डकी प्रदेशकी सचिव मनमाया पंगेनी, तुलसीपुर उपमहानगरपालिकाका मेयर घनश्याम पौडेल,जापानी समाजसेवी काजुसाका काकानीलाई पुरस्कृत गरिएको छ । त्यसैगरि उत्कृष्ण आँखा अस्पतालहरुमध्ये विराटनगर आँखा अस्पताल र भरतपुर आँखा अस्पताल सम्मानित भएका छन । दाताहरुमध्ये अर्बिट इन्टरनेशनल र सिविएम पुरस्कृत भएका छन भने दिर्घ सेवा पदकबाट नेत्रज्योति संघका कर्मचारीहरु भोला नाथ नेपाल र देबबहादुर बुढाथोकी छन । कार्यक्रममा नेपाल नेत्रज्योति संघका संस्थापक प्रा. डा. रामपूसाद पोखरेल र न्याम्सका उपकुलपति डा. डिएन शाहले नेपालको आँखा स्वास्थ्य उत्कृष्ठ भएको बताउँदै यसलाई अझै दू्रदराजसम्म पुर्याउनु आवश्यक रहेकोमा जोड दिएका थिए ।
