तिलगंगामा उत्पादित आँखाको लेन्स ३० भन्दा बढी देशमा निर्यात

हेल्थ टुडे
काठमाडौँ, १३ माघ : आँखामा मोतीबिन्दुको समस्या भएकाहरूका लागि ‘इन्ट्राअकुलर लेन्स’ वरदान साबित भएको छ । मोतिबिन्दूको शल्यक्रियापछि आँखाको नानीमा यो लेन्स प्रत्यारोपण गरिन्छ । जसबाट पुनः मानिसले संसारको उज्यालो देख्न सक्छन् । आँखाको उपचारमा प्रयोग हुने यो लेन्समा भने नेपाल आत्मनिर्भर रहेको छ ।

मोतीबिन्दुको कारण दृष्टिमा समस्या भएकाहरूलाई राखिने यो लेन्स भने नेपालमै उत्पादन हुने गरेको छ । झण्डै २७ वर्ष अघिदेखि नेपालमा तिलगंगा आँखा प्रतिष्ठानले यो लेन्स उत्पादन गर्ने गरेको छ । यो लेन्स उत्पादनमा नेपाल आत्मनिर्भर मात्र छैन नेपालमा खपत हुनेभन्दा धेरै मात्रामा विदेशमा समेत निर्यात हुने गरेको छ ।
सन् १९९५ देखि नै आँखा प्रतिष्ठानले लेन्स उत्पादन ल्याब स्थापना गरेको थियो भने त्यसबेलादेखि नै लेन्स उत्पादन गरेर बिक्री गर्न थालेको लेन्स उत्पादन विभागका उत्पादन प्रमुख अभय श्रेष्ठले जानकारी दिए । यहाँ उत्पादन भएका लेन्सहरू सार्क राष्ट्रसहित विश्वका विभिन्न ३० देशमा निर्यात हुने गरेको छ ।

तिलगंगा आँखा प्रतिष्ठानले हाल ३ प्रकारका इन्ट्राअकुलर लेन्स उत्पादन गर्दै आएको छ । पहिलो पिएनएमए, दोस्रो हाइड्रोफेलिक र तेस्रो लेन्स हाइड्रोफोविक हो । यो लेन्स उत्पादन तथा बिक्री वितरण गर्नका लागि यसका लागि अन्तर्राष्ट्रिय स्तरको मापदण्ड निर्धारित गरिएको हुन्छ । त्यही मापदण्डमा रहेर नेपाल आँखा प्रतिष्ठानले यो लेन्स उत्पादन गर्दै आएको छ ।

वार्षिक रूपमा ४ लाख हाराहारी सङ्ख्यामा यो लेन्स उत्पादन हुने गरेको छ । लेन्स कति उत्पादन गर्ने भन्ने कुरा मागमा भर पर्ने उनले बताए ।
उत्पादन प्रमुख श्रेष्ठले भने–‘यो लेन्स उत्पादन तथा बिक्री वितरण गर्नका लागि अन्तर्राष्ट्रिय किसिमको मापदण्ड हुने गर्छ । त्यो मापदण्ड हामीले परिपूर्ति गर्नुपर्ने हुन्छ । त्यसमा आईएसओ १३४८५ हुन्छ । साथै यो लेन्सलाई युरोपियन बजारमा बिक्री वितरण गर्नका लागि ‘सी’ मार्क पनि लिएको हुनुपर्छ । हामीसँग हालसम्म आइएसओ ९००१ आइएसओ १३४८५ र मार्क ‘सी’ हामीसँग छ ।’