हेल्थ टुडे,
काठमाडौ,१९ जेठः नेपालमा उत्पादन हुने औषधिको मूल्य १० प्रतिशतसम्म वृद्धि हुने भएको छ । सरकारले औषधिको कच्चा पदार्थमा अतिरिक्त मूल्य कायम गरेपछि आयातितको तुलनामा स्वदेशी औषधि महँगो हुने भएको हो । यसबाट स्वदेशी औषधि उद्योग बन्द गर्नुपर्ने अवस्था आउने व्यवसायीहरू बताउँछन् ।
आर्थिक वर्ष २०७६÷७७ को आर्थिक विधेयकमा हार्मोनाइज्ड कोडको २८ र २९ बाहेकमा आउने कच्चा पदार्थ र सहायक कच्चा पदार्थमा सरकारले भ्याट छुट नदिएका कारण औषधिको मूल्य बढ्ने उत्पादकहरूले बताएका छन् । आर्थिक विधेयकका कारण मूल्य बढ्ने नेपाल औषधि उत्पादक संघका अध्यक्ष दीपकप्रसाद दाहालले बताए ।
औषधिका लागि अतिआवश्यक निर्माण सामग्रीमा ४३ प्रतिशत कर लाग्ने देखिन्छ । नेपाली औषधि उद्योगलाई निरुत्साहित गर्ने गरी कर लगाइएको औषधि उत्पादकहरूको भनाइ छ । औषधि व्यवसायी संघका केन्द्रीय अध्यक्ष मृगेन्द्रमेयर श्रेष्ठ औषधिको कच्चा पदार्थ र औषधिमा भ्याट लगाउन नहुने बताउँछन् ।
औषधि व्यवस्था विभागका महानिर्देशक नारायणप्रसाद ढकाल पनि औषधिको कच्चा पदार्थमा भ्याट लगाउन नहुने बताउँछन् । नेपाली औषधि बजारमा नेपालमा उत्पादित औषधिको मूल्यभन्दा बाह्य देशबाट आयातित औषधिको मूल्य सस्तो पर्ने भएको छ । सरकारले नेपाली औषधि उद्योगको आधारभूत संरक्षणमा चासो नदेखाउँदा र आयातित कच्चा पदार्थमा छुट नदिँदा औषधिको मूल्य ५ देखि १० प्रतिशतसम्म बढ्ने भएको यस क्षेत्रका व्यवसायिको भनाई छ ।
नेपालमा आयात हुने औषधिमा ४ प्रतिशत भन्सार लाग्दै आएको छ र मूल्य अभिवृद्धिकर नलाग्ने व्यवस्था आर्थिक विधेयकमा उल्लेख छ । तर, स्वदेशी औषधि उद्योगले हार्मोनाइज्ड कोडको २८ र २९ बाहेकका अन्य कच्चा पदार्थमा मूल्य अभिवृद्धिकर लगाउँदा विकास क्रममा रहेका नेपाली औषधि उद्योग धराशायी पर्ने देखिन्छ ।
२०७४ सालमा तत्कालीन स्वास्थ्यमन्त्री गगन थापाको पालामा नेपालमा उत्पादन हुने ३० प्रकारका औषधिको आयात रोक्ने निर्णय भएको थियो । तर, अहिले तिनै औषधि धमाधम आयात भइरहेका छन् । अहिले वार्षिक २० अर्बको औषधि नेपाली उद्योगले धानिरहेको छ भने २५ अर्बको औषधि विदेशबाट आयात हुने गरेको छ ।(राजधानी दैनिकबाट)
Leave a Reply