हेल्थ टुडे,
काठमाडौ,असोजः काठमाडौको सिनामंगलस्थित काठमाडौँ मेडिकल कलेज (केएमसी) मा एक महिलाले एकैपटक चार जना शिशु जन्माएकी छन् । कैलालीको धनगढीकी २७ वर्षिया खगित्रा शाहीले बुधवार एकैपटक चारजना शिशुहरूलाई जन्म दिएकी हुन् । शाहीले शल्यक्रियामार्फत् एकै पटक तीन छोरा र एकजना छोरी गरी ४ शिशुलाई जन्माएकी हुन् ।
तीनजना शिशुहरूको स्वास्थ्य अवस्था सामान्य रहेको तर एकजनाको अवस्था भने अस्थिर देखिएको अस्पतालले जनाएको छ ।शल्यक्रियामा संलग्न चिकित्सकका अनुसार टेस्टट्युब बेबीका रूपमा जन्माइने सन्तानका हकमा भने धेरै बच्चा रहन सक्छन् । तर उनको भने सामान्य अवस्थामै गर्भ रहेको हो । धनगढीमा चेकजाँच गर्दा ४ वटा बच्चा भएको पत्ता लागेको थियो । त्यहाँका चिकित्सकले काठमाडौ रिफर गरेपछि शाही केएमसीमा भर्ना भएकी थिईन ।
पेट ठूलो भएर अप्ठेरो भएपछि सल्यक्रिया गरी सुत्केरी गराएको चिकित्सकले बताएका छन् । शिशुहरू ३४ हप्ता नपुग्दै जन्मिएका कारण ती शिशुहरूलाई श्वासप्रश्वासमा कठिनाई हुनसक्ने भएकाले केही साता विशेष स्वास्थ्य निगरानीमा राख्नुपर्ने शल्यक्रियामा संलग्न चिकित्सकले बताएका छन् ।
सामान्यतः नवजात शिशु जन्मंदा साढे दुई किलो तौल हुनुपर्छ । ३४ हप्ता पूरा भएपछि फोक्सो पूर्ण रूपमा विकास हुनेगर्छ। जन्मिएका शिशुमध्ये सबैभन्दा कम एकजनाको तौल ९५० ग्राम र बाँकी तीनको क्रमशः १.४ केजी, १.५ केजी र १.६ केजी रहेको चिकित्सकहरूले बताएका छन् ।
Leave a Reply