वरिष्ठ दन्तरोग विशेषज्ञ डा. पन्तको निधन

हेल्थ टुडे,
काठमाडौं, माघ १४ : वरिष्ठ दन्तरोग विशेषज्ञ प्रा. डा. निरज पन्तको मस्तिष्क रक्तश्राव ‘ब्रेन हेमरेज’ का कारण मंगलबार मेडीसिटी हस्पिटलमा निधन भएको छ । नेपाल मेडिकल काउन्सिलका पूर्व सदस्य डा. पन्त हाल नेपाल मेडिकल कलेज,जोरपाटी डेन्टल विभागका प्रवन्ध निर्देशक पदमा कार्यरत थिए । ५१ बर्षिय डा. पन्तलाई गत बिहीबार मस्तिष्क रक्तश्राव भएपछि भैसेपाटीस्थित नेपाल मेडिसिटी हस्पिटल भर्ना गरिएको थियो । शुक्रबार उनको मस्तिष्कको शल्यक्रिया गरिएको थियो । शल्यक्रिया सफल नभएपछि शनिबार पुनः शल्यक्रिया गरिएको थियो । दोश्रो पटक गरिएको शल्यक्रिया पनि सफल नभएपछि मंगलबार उनको निधन भएको हो । धनगढी स्थायी घर भएका डा. पन्तका एक छोरी र एक छोरा छन् । उनको बुधबार बिहान पशुपति आर्यघाटमा अन्तिम संस्कार गरिने छ । डा. पन्तको निधनल नेपालको दात उपचारको क्षेत्रमा अपूरणीय क्षति भएको दन्त रोग विज्ञहरुले बताएका छन । हिमाल डेन्टल हस्पिटलका प्रवन्ध निर्देशक डा. राजेन्द्र भट्टले डा. पन्तको निधनले नेपालको दन्त चिकित्सा क्षेत्रले अभिभावक गुमाएको बताए । वरिष्ठ दन्तरोग विशेषज्ञ डा. सुमन गौतमले यो अकल्पनिय घटनाले स्तब्ध बनाएको बताउदै डा. पन्तको योगदानलाई दन्त चिकित्सा क्षेत्रले सधै स्मरण गरिरहने बताए ।