प्रधानमन्त्री ओलीको आईतबार चौथो पटक डायलासिस सम्पन्न

हेल्थ टुडे,
काठमाडौ,९ मंसिरः मिर्गौलाको कार्यक्षमतामा ह्रास आएपछि प्रधानमन्त्री केपी शर्मा ओलीको चौथो पटक आइतबार ग्रान्डी इन्टरनेसनल अस्पतालमा डायलासिस गरिएको छ । ग्रान्डी अस्पताल स्रोतले आइतबार अपराह्न अस्पताल भर्ना भएका प्रधानमन्त्री ओलीलाई डायलासिसपछि डिस्चार्ज गरिएको जनाएको छ। अस्पताल स्रोतले भन्योः‘ प्रधानमन्त्रीको स्वास्थ्य परीक्षणपछि चौथो पटक डायलासिस भएको छ, उहाँले आराम महसुस गरेपछि अस्पतालबाट डिस्चार्ज गरेका छौँ ।’

ओलीको यसअघि कार्तिक १३, १४ र ३० गते गरी तीन पटक सोही अस्पतालमा डायलासिस गरिएको थियो । प्रधानमन्त्री ओलीको अहिले नियमित डायलासिस गरिराखिएको भएपनि यो उपयुक्त विकल्प नभएको चिकित्सकले बताएका छन् । चिकित्सकहरुले मिर्गौला प्रत्यारोपण नै उपयुक्त हुने सुझाव दिएका छन् । उपचारमा संलग्न एक चिकित्सकले पनि दीर्घकालीन समस्या समाधानका लागि प्रत्यारोपण गर्नुपर्ने धारणा राखे ।
१२ वर्ष अघि प्रत्यारोपित मिर्गौलाको कार्यक्षमतामा ह्रास आएपछि ओलीले नियमित डायलासिस गर्नु पर्ने अवस्था आएको छ। गत भदौँ पाँच गते दोस्रो पटक सिंगापुर गएर प्रधानमन्त्री ओलीले आफ्नो उपचार गरेका थिए । त्यतिबेला उनको मिर्गौला सम्बन्धी ‘एन्टिबडी’ ‘प्लाज्मा फेरेसिस’ पद्दतीबाट निकालिएको थियो । त्यो बेला नै प्रधानमन्त्री ओलीले दोस्रो पटक मिर्गौला प्रत्यारोपण गर्ने चर्चा चलेपनि उनले खान सुरु गरेको औषधिको प्रतिअसरको प्रतिक्षा गर्नु पर्ने भएको र दोस्रो पटक मिर्गौला प्रत्यारोपणबारे थप परामर्श आवश्यक परेपछि उनी स्वदेश फर्किएका थिए ।
ग्रान्डी अस्पतालमा दोस्रो पटक डायलासिस गरिसकेपछि प्रधानमन्त्री ओलीको दोस्रो पटक मिर्गौला प्रत्यारोपण अमेरिकामा हुने चर्चा चलेको थियो। तर अमेरिकाको कानुनी झन्झटले गर्दा ओलीले नेपालमै दोस्रो पटक मिर्गौला प्रत्यारोपण गर्न सक्ने बताइएको छ । यद्धपि प्रत्यारोपण कहाँ गर्ने भन्ने बारे निर्णय भईसकेको छैन । कतिपय चिकित्सकले उनलाई नेपालमै त्यो उपचार गर्न सुझाएका छन् ।
भारत, अमेरिका लगायत मुलुकमा प्रत्यारोपण गर्ने कि नेपालमै गर्ने भन्नेबारे छलफल भईरहेको जनाइएको छ । मंसिर १४ को उपनिर्वाचन सकिएपछि उपचारका लागि तय हुने प्रधानमन्त्री ओलीको सचिवालय स्रोतले जनाएको छ ।