उपत्यकाभित्र ५० र सिरहाका २५ ठाउँमा धारालाई नछोई हात धुन सकिने स्टेसन स्थापना, ललितपुर प्रहरी परिसरबाट सुभारम्भ

हेल्थ टुडे,
ललितपुर, १ बैसाख : पानीको धारालाई हातले नछोएरै सावुन पानीले मज्जाका साथ हात धुन मिल्ने गरि उपत्यकाभित्र ५० ठाउँका र सिरहामा २५ गरि ७५ ठाउँमा हात धुने स्टेसन (कन्ट्याक्टलेस ह्याण्डवासिङ स्टेसन) स्थापना गर्न थालिएको छ । कोरोना भाइरसको संक्रमण बढी रहेका बेला त्यसबाट बच्ने भरपर्दो उपायका रुपमा साबुन पानीले हात धुने उपायलाई व्यवहारमा उतार्न यो नयाँ प्रविधिमार्फत हात धुने बानीको विकास गर्न हात धुने स्टेसन स्थापना गर्न लागिएको हो । यी स्टेसनमा हात धुने स्टेशनसँगै जडित भुँईमा रहेको संयन्त्रलाई खुट्टाले दबाएपछि धाराको टुटीबाट पानी झर्न थाल्छ र दवाउन छोडेपछि पानी आफै बन्द हुन्छ । कोरोना भाइरस हातको माध्यमबाट धारा र धाराको माध्यमबाट अरु व्यक्तिलाई समेत सर्ने भएकाले वाटरएड नेपालले हातले नछोईकन हात धुन मिल्ने प्रविधि ल्याएको हो ।
नेपाल सरकार र अन्य साझेदार संस्थाहरुको सहकार्यमा वाटरएड नेपालले यी हातले छोइरहनु नपर्ने (कन्ट्याक्टलेस ह्याण्ड वासिङ स्टेसन) हात धुने स्टेसनहरुको स्थापना गर्न सुरु गरेको हो । जावलाखेलमा रहेको महानगरीय प्रहरी परिसर ललितपुरमा स्थापना गरेर यसको शुभारम्भ गरिएको छ । ललितपुर महानगरपालिकाका मेयर चिरिबाबू महर्जनले एक समारोहबिच आईतबार धारालाई हातले नछोएरै सावुन पानीले हात धुन मिल्ने गरि स्टेसनको उद्घाटन गरेका छन् । मेयर महर्जनले कोरोना भाइरस हातको माध्यमबाट धारा र धाराको माध्यमबाट अरु व्यक्तिलाई समेत सर्ने भएकाले यस किसिमको नयाँ प्रविधि ल्याएर विभिन्न स्थानमा स्थापना गर्न लागेकोमा खुशी व्यक्त गर्दै महानगरपालिकाले वाटरएड नेपालसँग भविश्यमा पनिसँग सहकार्य गर्ने बताए ।
शुभारम्भ कार्यक्रममा वरिष्ट मुटु रोग विज्ञ डा.भगवान कोइरालाले कोरोना भाइरसबाट लड्ने दुई तरिका मध्ये एउटा तरिका नियमित साबुन पानीले हात धुनु रहेको बताउदै धारालाई नछोएरै हात धुने प्रविधि सहितका हात धुने स्टेसन स्थापनाले कोरोना भाईरस संक्रमण कम गर्न सहयोग पुग्ने बताए । शहर बजारमा कतिपय मानिसले हात धुने ठाउँको अभाव र साबुन भएपनि पानीकै अभावमा हात धुन नपाईने अवस्थामा वाटर एडले स्थापना गरेको हात धुने स्थानले लक्षितवर्गलाई यसले फाइदा पुग्ने डा.कोइरालाले बताए । वाटरएड नेपालका कन्ट्री डाइरेक्टर तृप्ती राईले हातको माध्यमबाट सर्ने विभिन्न रोगबाट बच्ने एउटै सरल तरिका हात धुनु रहेपनि करिब १ करोड ४८ लाख मानिस सँग हात धुने ठाउँकै अभाव रहेको बताइन् । उनले कोरोनाबाट बच्न मात्र नभई अन्य विभिन्न रोगबाट बच्न साबुन पानीले नियमित हात धुनुपर्नेमा जोड दिइन् ।
महानगरीय प्रहरी परिसर ललितपुरका एसएसपी टेक प्रसाद राईले ड्यूटीमा खटिएका प्रहरीहरुलाई समेत धारा नै नछोई हात धुने स्थान परिसमा स्थापना हुनु उपयोगी हुने बताए । खुट्टाले टेक्ने वित्तिकै धाराबाट पानी निस्कने भएकाले कुनै व्यक्तिमा कोरोना संक्रमण नहुने भएकाले यसबाट प्रहरी पनि लाभान्वित हुनेमा उनले जोड दिए । आईतबार नै ललितपुरको लगनखेल बसपार्कमा पनि हात धुने स्टेशन निर्माण गरिएको छ । वाटरएड नेपालका अनुसार एक हप्ताभित्र काठमाडौं उपत्यकाका विभिन्न ठाउँमा ५० वटा र त्यसपछि सिरहाको लहान नगरपालिकामा २५ गरि जम्मा ७५ वटा हातले नछोएरै हात धुन मिल्ने स्टेसन स्थापना गरिने छन । यसले कोरोना भाइरस संक्रमण हटाउन ठूलो सहयोग मिल्ने विज्ञहरुले बताएका छन ।