शेर प्रतिष्ठान द्वारा बिरामिलाई सहयोग

नमराज भट्ट
काठमाडौ ३० जेठः प्रदेश नं.३ कि उपसभामुख राधिका तामाङले बुवा शेर बहादुर तामाङ र आमा राम्री तामाङको नाममा स्थापित शेरा स्मृति स्वास्थ्य ,शिक्षा प्रतीष्ठानले बिरामिलाई सहयोग गर्नुभएको छ । क्यान्सर (अर्बुद), बोनम्यारो, नसा लगायत दीर्घरोगका छ जना बिरामीलाई चेक मार्फत रकम सहयोग गर्नुभएको हो । बिरामी र आफन्तलाई वन तथा वातावरणमन्त्री शक्तिबहादुर बस्नेत, प्रतिनिधिसभा सदस्य हितबहादुर तामाङ, प्रतिष्ठानकी संयोजक समेत रहेकी उपसभामुख तामाङले सहयोग स्वरुप चेक हस्तान्तरण गर्नुभएको हो ।
सहयोग पाउनेहरुमा बोनम्यारो पीडित नुवाकोट तादी–४ की अनिता श्रेष्ठ, नसा रोग पीडित शिवपुरी ५ की सबिता ढकाल, फोक्सोको क्यान्सर पीडित दुप्चेश्वरकी फूलमाया तामाङ, शिवपुरी ३ का ब्लड क्यान्सर पीडित नारायण प्रसाद खतिवडा, सिन्धुली घ्याङलेक १ का सुरेन्द्र बोम्जन, सिन्धुपाल्चोक बाह्रबिसेकी फुलु श्रेष्ठ शेर्पा रहेका छन । अनिता र सबितालाई जनही २५ हजार र अन्यलाई २० हजारका दरले सहयोग दिइएको छ । उनीहरुको काठमाडौं, भक्तपुरका विभिन्न अस्पतालमा भइरहेको छ ।
कार्यक्रममा वनमन्त्री बस्नेतले प्रतिष्ठानले गरेको कार्य प्रशंसनीय रहेको उल्लेख गर्दै यसबाट धेरैलाई प्रेरणा मिल्ने विश्वास व्यक्त गर्नुभयो । राजनीतिक अधिकारले मात्रै नागरिकलाई नपुग्ने भन्दै उनले पूर्णलोकतन्त्रका लागि गाँस, बास, कपास, शिक्षा, स्वस्थ्यमा पहुँच पुग्नु पर्ने बताउनुभयो । त्यसका लागि सरकार जिम्मेवार भएर लागिरहेकोले सबै नागरिक पनि सचेत हुन आवश्यक रहेको उहाले बताउनुभयो ।
सांसद तामाङले संस्कार र संस्कृतिलाई समयअनुसार परिवर्तन गर्दै सामाजिक कार्यमा अघि बढ्न सबैलाई आह्वान गर्नुभयो ।

स्वास्थ्य सचेतना तथा बिरामीलाई सहयोग हस्तान्तरण कार्यक्रममा वीर अस्पतालका वरिष्ठ क्यान्सर रोग विशेषज्ञ डा. विष्णुदत्त पौडेल र भरतपुर क्यान्सर अस्पतालका डा. कृष्णसागर शर्माले क्यान्सर रोग लाग्नुको कारण, लक्षण र निदानबारे प्रस्तुतिकरण दिनुभएको थियो ।