विश्वभर दादुराको संक्रमण तीन गुणा बढ्योः डब्लुएचओ

हेल्थ टुडे,

एजेन्सी,३ बैशाखः विश्व स्वास्थ्य संगठन (डब्लुएचओ) ले विश्वव्यापी रुपमा सन् २०१९ को पहिलो तीन महिनामा दादुरा संक्रमणको दर तीन गुणा बढेको जनाएको छ । गएको वर्ष सोही अवधिको तुलनामा यो वर्ष दादुराको संक्रमण तीन गुणा बढि रहेको डब्लुएचओले जनाएको छ ।

डब्लुएचओका अनुसार विश्वका सबै क्षेत्रमा दादुराको संक्रमण बिस्तार भएको देखिएको छ । सबैभन्दा धेरै अफ्रिका क्षेत्रमा दादुराको संक्रमण बढेको छ । यो क्षेत्रमा अघिल्लो वर्षको तुलनामा संक्रमण दर ७०० प्रतिशत बढि हो । दादुरा तीव्र गतिमा फैलिने संक्रमणात्मक भाइरल संक्रमण हो । यसका कारण गम्भीर स्वास्थ्य समस्या पनि हुन सक्छ ।

अहिले १० मा एकजना संक्रमितका बारेमा मात्रै थाहा भएकाले विश्वभर संक्रमितको संख्या अधिक हुन सक्ने डब्लुएचओले जनाएको छ । युक्रेन, माडागास्कर तथा भारत सबैभन्दा बढि प्रभावित देशमा पर्छन् । यी देशमा हरेक १० लाखमा दशौँ हजारमा संक्रमण भएको पाइएको छ ।