जाजरकोट,१३ फागुन । जिल्ला अस्पताल जाजरकोटमा पहिलो पटक आकस्मिक प्रसूति शल्यक्रिया सेवा सुरु भएको छ । ५० शैय्याको जिल्ला अस्पतालमा विशेषज्ञ चिकित्सकसहितको शल्यक्रिया सेवा सञ्चालनमा आएको हो । अस्पतालमा विशेषज्ञ चिकित्सक नहुँदा यसअघि प्रसूति शल्यक्रिया गर्नुपर्ने गर्भवती महिलाले जिल्लाबाहिर जानुपर्ने बाध्यता थियो ।
गतवर्ष कर्णाली स्वास्थ्य विज्ञान प्रतिष्ठान जुम्लाबाट काजमा जाजरकोट आएका चिकित्सकले सामान्य शल्यक्रिया सुरु गरेका थिए । तर, प्रतिष्ठानका चिकित्सक काज सकेर फर्केपछि अस्पतालमा प्रसूति सेवा बन्द भएको थियो । प्रसूति शल्यक्रिया सेवा सञ्चालनमा आएपछि पाँच महिलाले प्रसूति सेवा लिएका छन् ।
जिल्ला अस्पतालमै शल्यक्रियासहितको प्रसूति सेवा सुरु भएपछि स्थानीय खुसी भएका छन् । अति जटिलबाहेक सबै प्रकारका शल्यक्रिया सेवा अस्पतालबाट दिन सकिने अस्पतालले जनाएको छ ।
Leave a Reply