चिकित्सक संघको निर्वाचनः डा.मरासिनीलाई प्रमुख निर्वाचन अधिकृतको जिम्मेवारी

हेल्थ टुडे,
काठमाडौ,१२ साउनः चिकित्सकहरुको छाता संस्था नेपाल चिकित्सक संघको आगामी निर्वाचनका लागि संघले प्रमुख निर्वाचन अधिकृत तोकेको छ। योसंगै नयाँ कार्यकालका लागि चुनावी चहलपहल सुरु भएको छ ।

संघको निर्वाचन आगामी माघमा गर्ने तयारी भइरहेको छ । शनिवार बसेको संघको काउन्सिल बैठकले स्वास्थ्य तथा जनसंख्या मन्त्रालयका पूर्व सहसचिव डा. बाबुराम मरासिनीलाई प्रमुख निर्वाचन अधिकृत तोकेको हो।

निर्वाचनको मिती पनि प्रमुख निर्वाचन अधिकृतले पछि सार्वजनिक गर्ने बताइएको छ । निर्वाचनका लागि प्रमुख निर्वाचन अधिकृतले अरु दुई जना सदस्य सिफारिस गर्ने छन्।

डा.मरासिनीले सिफारिस गरेका अधिकृतको नामलाई संघको कार्यकारिणीले स्वीकृत गर्नुपर्ने व्यवस्था छ । निर्वाचनपछि फागुनको १५ देखि १७ गते पोखरामा एनएमए सम्मेलन हुनेछ ।