राप्ती स्वास्थ्य विज्ञान प्रतिष्ठानका पूर्वउपकुलपति डा. संगीता सहित १३ जनाविरुद्ध भ्रष्टाचार मुद्दा

हृल्थ टुडे,
काठमाडौं, २३ असोज : अख्तियार दुरुपयोग अनुसन्धान आयोगले राप्ती स्वास्थ्य विज्ञान प्रतिष्ठानकी पुर्व उपकुलपति प्रा.डा.संगिता भण्डारीसहित १३ जनाविरुद्ध विशेष अदालतमा भ्रष्टाचार मुद्दा दायर गरेको छ । चार वर्ष पहिले उनी उक्त प्रतिष्ठानको उपकुलपति थिइन । डा. भण्डारी माथि कम गुणस्तरको एमआरआई मेसिन खरिदमा १२ करोड ७ लाख रुपैयाँभन्दा बढी रकम अनियमितता गरेको आरोप छ ।
आयोगले उनीहरूविरुद्ध कैद र विगो जरिवाना सजाय मागदाबी गरेको छ । अख्तियारले भण्डारीसहित प्रतिष्ठानका तत्कालीन कामु रजिष्ट्रार झन्कार लामिछाने, तत्कालीन आर्थिक व्यवस्थापक कैलाश प्रसाद देव, बायोमेडिकल इन्जिनियर शदर भण्डारी, त्रिवि शिक्षण अस्पताल महाराजगञ्जका बायोमेडिकल इन्जिनियर अमित कुमार चौधरी लगायत विरुद्ध कैद र विगो जरिवाना सजाय मागदाबी गरेको छ ।
यसैगरी राप्ती स्वास्थ्य विज्ञान प्रतिष्ठानका डेपुटी फाइनान्स म्यानेजर नितिन कुर्मी, राप्ती स्वास्थ्य विज्ञान प्रतिष्ठानका शाखा अधिकृत श्रीराम चौधरी, राप्ती स्वास्थ्य विज्ञान प्रतिष्ठानका आईटी अफिसर हिरालाल भण्डारी, राप्ती स्वास्थ्य विज्ञान प्रतिष्ठानका सिभिल इन्जिनियर मदन भण्डारीविरुद्ध पनि भ्रष्टाचार मुद्दा दायर भएको छ ।
अख्तियारका अनुसार भ्रष्टाचार मुद्दा दायर गरिएकाहरूमा थप राप्ती स्वास्थ्य विज्ञान प्रतिष्ठानका तत्कालीन वरिष्ठ सहायक अञ्जु शर्मा, राप्ती स्वास्थ्य विज्ञान प्रतिष्ठानका तत्कालीन वायोमेडिकल इन्जिनियर सुजाता भट्टराई र लुम्बिनी हेल्थकेयर प्रालि तथा उक्त कम्पनीको मुख्य भई काम गर्ने अध्यक्ष पोष्टराज ज्ञवाली समेत रहेका छन् । डा. भण्डारीको कार्यकाल सकिएपछि नियुक्त भएका उपकुलपतिलाई डा. संगीताकै पालामा गएको घाटा पूर्ति गर्न हम्मे हम्मे गरेको थियो । डा. संगीताले उपकुलपति छदा दिउँसै कार्यालयमै बसेर मदिरा सेवन गर्ने र अनावश्यक खर्च गरेर त्यसको बील प्रतिष्ठानको क्यान्टिनलाई पठाउने गरेको त्यहाँ कार्यरत कर्मचारीले बताए । मदिराका बिल प्रतिष्ठानबाट भुक्तानी नमिल्ने भए पनि उनले दिनमै ५० किलो प्याज र १० किलो हरियो खुर्शानीको विल बनाएर पास गर्ने गरेकी थिइन । डा. भण्डारी त्यो भन्दा पहिले पाटन स्वास्थ्य विज्ञान प्रतिष्ठान र विपी कोइराला स्वास्थ्य प्रतिष्ठानमा पनि बस्दा समेत विबादमा तानिएकी थिइन ।