स्तन क्यान्सर सम्बन्धि जनचेतना बिस्तार गर्ने उद्देश्यले हरिसिद्घिस्थित नेपाल क्यान्सर अस्पतालले अक्टूबर महिनाभरि विविद् जनचेतनामूलक कार्यक्रमको आयोजना गरि मनाउने भएको छ ।
अस्पतालले बुधबार पत्रकार सम्मेलन गरि स्तन क्यान्सर सम्बन्धि जनचेतनामूलक पदयात्रा, स्तन क्यान्सरमाथि बिजय प्राप्त गरेका व्यक्तिहरुको भेला, स्तन क्यान्सर सम्बन्धि निशुल्क परामर्श सेवा, चेतनामूलक डबली नाच, स्तन क्यान्सरको स्क्रिनिङमा ५० प्रतिसत छुट लगायतका विविद् कार्यक्रम आयोजना गरिने जानकारी दिएको हो । अस्पतालले यही असोज २८ गते ( अक्टूबर १४ ) का दिन राजधानीको दरबारमार्गदेखि माइतीघर मण्डलासम्म चेतनामूलक क्यान्सर सम्बन्धि पदयात्रा (वाकाथन) को आयोजना गर्ने भएको छ भने ३० गते अस्पतालमै स्तन क्यान्सर माथि बिजय प्राप्त गरेका व्यक्तिहरुको भेलाको आयोजना गर्ने जनाएको छ ।
अस्पतालका अध्यक्ष एवं वरिष्ठ क्यान्सर रोग विशेषज्ञ डा.सुदीप श्रेष्ठका अनुसार अक्टूबरदेखि नोबेम्बर ८ सम्म स्तन क्यान्सर स्क्रिनिङमा ५० प्रतिसत छुट दिइने बताए । प्रारम्भिक अवस्थामा पहिचान गर्न सके ८० प्रतिसतको रोग निको पार्न सकिने अवस्था भएपनि जनचेतनाको कमिले नेपालमा रोग छिप्पिएपछि मात्र उपचारका लागि आउने गरेकाले ६५ प्रतिसतको मात्र पूर्ण निको पार्न सकिने अवस्था रहेको डा. श्रेष्ठले बताए । पत्रकार सम्मेलनमा अस्पतालका स्तन क्यान्सर विशेषज्ञ डा. कपिन्द्रसेखर अमात्यले स्तन क्यान्सरबाट बच्ने एकमात्र उत्तम उपाय प्रारम्भिक अवस्थामै यसको पहिचान गर्नु भएकोले जनचेतना जगाउनु जरुरी रहेको बताए ।
नेपालमा पाठेघरको मुखको क्यान्सर पछि महिलाहरुमा सबैभन्दा धेरै हुने नै स्तन क्यान्सर हो । विज्ञहरुका अनुसार हरेक वर्ष लगभग पाँच हजार नेपाली महिलाहरुलाई स्तन क्यान्सर हुने अनुमान गरिएको छ ।
Leave a Reply