उपचारका लागि मन्त्री यादवलाई थाइल्याण्ड लगियो

हेल्थ टुडे,
काठमाडौँ, ६ जेठः उद्योग , वाणिज्य तथा आपूर्ति मन्त्री मातृका प्रसाद यादवलाई थप उपचारका लागि आज थाइल्याण्ड लगिने भएको छ ।
चिकित्सकको सल्लाह अनुसार मन्त्री यादवलाई आज थाइल्याण्डको ब्रुमग्राड अस्पताल लैजान लागिएको उहाँका स्वकीय सचिव सन्तोष विष्टले जानकारी दिनुभयो । आज अपराह्न १.३० बजे उहालाईँ थाई एयरको जहाजबाट त्यसतर्फ लगिएको हो ।
लामो समयदेखि छालाको संक्रमण, टाउकाको समस्या तथा कम्मर मुनिको भाग नचल्ने भएपछि नर्भिक अस्पतालमा उपचार भइरहेको थियो । नेकपाका अध्यक्ष पुष्पकमल दाहाल‘प्रचण्ड’ले केही दिन पहिले उहाँलाई भेटी सम्भव भएसम्म स्वदेश र नभए विदेशमा उपचारको प्रबन्ध गरिने बताउनुभएको थियो ।
टाउकोको पछिल्लो भागमा निकै दुखाई भएपछि उहाँलाई जेठ २ गते अस्पताल भर्ना गरिएको थियो । उहाँलाई नर्भिकका नशा रोग विशेषज्ञ डा पंकज जलान र डा जेपी जैशवालले उपचार गरिरहेका थिए । भनिएकै समयमा उपचार प्रक्रिय सकिए मन्त्री यादव जेठ १२ मा नेपाल आइपुग्ने मिति तय गरिएको छ ।