लहान,१९ फागुन । सिरहाको सुखीपुर नगरपालिकास्थित स्वास्थ्य संस्थामा महिलाको परिवार नियोजनका अस्थायी साधन ‘डिपो’ र पुरुषले प्रयोग गर्ने कण्डमको अभाव भएको छ । स्वास्थ्य संस्थाबाट निःशुल्क रूपमा महिलाले प्रत्येक तीन महीनाका लागि अस्थायी साधनको रूपमा लगाउने गरेको डिपो खोप र पुरुषले प्रयोग गर्ने कण्डमको अभाव हुँदा इच्छा विपरित पनि महिलाले गर्भधारण गर्नुपर्ने बाध्यता उत्पन्न भएको छ ।
कण्डम, पिल्सजस्ता अरू पनि अस्थायी साधन छन् तर परिवार नियोजनका लागि अधिकांश दम्पतीले डिपोको प्रयोग गर्दै आएका छन् । सुखीपुर क्षेत्रमा हरेक तीन महीनामा एक हजार २०५ महिलाले डिपो र प्रतिमहीना २०० भन्दा बढी पुरुषले कण्डम प्रयोग गर्दै आएको स्वास्थ्य चौकी सुखीपुरको तथ्याङ्कमा उल्लेख छ ।
स्वास्थ्य चौकी सुखीपुरका प्रमुख भुपेशरतन यादवले भनेः‘ एक महीनाअघि नै डिपो सकिएपछि डिपो नआएसम्मका लागि पसलबाटै खरीद गरेर कण्डम प्रयोग गर्न सल्लाह दिएको छु ।’ डिपो र कण्डम खरीद गरी आपूर्ति गर्न स्थानीय सरकारलाई आग्रह गरेको र छिट्टै आपूर्ति गर्ने प्रतिबद्धता आएको उनको भनाई छ ।
नवविवाहिता बाहेकका अधिकांश महिलाले कण्डम र चक्कीको साटो डिपो खोप लगाउने गरेको उक्त स्वास्थ्य चौकीमा कार्यरत स्वास्थ्यकर्मीको भनाइ छ । कण्डम बालबालिकाले भेट्ने, फुक्ने र कण्डम प्रयोग गरेको घरपरिवारका सदस्यले थाहा पाउने भएकाले लाजका कारण महिला र पुरुष कण्डमको साटो डिपोप्रति आकर्षित भएका हुन् ।
Leave a Reply