तीन सातादेखि फैलिएको महामारीका कारण हुम्लामा मृत्यु हुनेको संख्या ९ पुग्यो,२ सय जना भन्दा बढी बिरामी

हेल्थ टुडे,
हुम्ला,१५ बैशाखः तीन सातादेखि फैलिएको अज्ञात रोगका कारण हुम्ला जिल्लाको ताँजाकोट गाउँपालिका–२ जिमाना गाउँमा मृत्यु हुनेको संख्या ९ पुगेको छ । गत चैत २६ गतयता फैलिएको महामारीले दुई सय बासिन्दा बिरामी परेपनि उनीहरूले अझै औषधि पाएका छैनन् । इपिडिमियोलोजी तथा रोग नियन्त्रण महाशाखाले ताँजाकोटमा मृत्यु हुनेको संख्या ९ पुगेको जनाएको छ ।

मृत्यु हुनेमा ताँजाकोट गाउँपालिकाकी ७५ वर्षीया कुसुकली रिठाल, ६० वर्षीय सुरजित खड्का, ५५ वर्षीय वीरबल रिठाल, ५५ वर्षीय रङ्गे काली, पाँच वर्षीया सुनकेस्रा सुनार, ७० वर्षीया अम्मकली मल्ल र ५५ वर्षीय लक्ष्य सुनारको मृत्यु भएको छ । यस्तै, ७६ वर्षीय बज्जिरे सुनार, दशमहिने बालक सञ्जीव थापाको महामारीबाट मृत्यु भएको छ ।

बिरामीमा टाउको दुख्ने, वाकवाकी लाग्ने, छाती दुख्ने, ज्वरो आउने लक्षण देखिएको छ । परीक्षण नभएकाले रोग के हो भन्नेसमेत पहिचान हुन सकेको छैन । महामारीबाट मृत्यु हुनेमा अधिकांश वृद्धवृद्धा र बालबालिका छन् । ताँजाकोट गाउँपालिका वडा नम्बर १, २ र ३ मा दुई सय ५० भन्दा बढीमा रुघाखोकी र ज्वरो देखिएको स्थानीयले जनाएका छन् । संक्रमण देखिएको दुईदेखि चार दिनभित्रै बिरामीको मृत्यु हुने गरेको छ ।

सोहि गाउँमा रहेको मैला स्वास्थ्य चौकीका अहेव मोतीलाल जैसीका अनुसार दुई दिनअघि १० महिने बालकको समेत मृत्यु भएको छ । पूरै गाउँ इन्फ्लुएन्जाबाट प्रभावित भएको उनले जानकारी दिएका छन् । केन्द्र र प्रदेश सरकारको कुनै पनि स्वास्थ्य टोली अहिलेसम्म प्रभावित गाउँमा पुगेको छैन ।

मोटर बाटो नपुगेको सदरमुकाम सिमकोटबाट ४५ कोस टाढा पर्ने ताँजाकोट गाउँ पुग्न पैदल जान तीन दिन लाग्छ । प्रभावित क्षेत्रमा सरकारले अझै डाक्टर र औषधि पठाएको छैन । प्रदेश सरकारले शनिबार नेपालगञ्जबाट बाजुराको कोल्टीसम्म जहाजमा जाने र त्यहाँबाट पैदल पठाउने गरि शनिबार औषधि र उपकरणसहितको स्वास्थ्यकर्मी टोली खटाएका जनाएको छ । बाजुराको कोल्टीबाट पैदल ताँजाकोट पुग्न एक दिन लाग्छ । तर, प्रतिकूल मौसमका कारण कोल्टीका लागि जहाज उड्न नसकेपछि टोली नेपालगञ्जबाट अघि बढ्न सकेन ।

सुर्खेतबाट औषधिसहित चिकित्सकको टोली ताँजाकोट ल्याउन हेलिकोप्टर उपलब्ध गराइदिन हुम्ला जिल्ला प्रशासन कार्यालयले गृहमन्त्रालयलाई पत्र पठाएको छ । तर, गृह मन्त्रालयले शनिबार अबरेसम्म पनि हेलिकोप्टर उपलब्ध गराउने निश्चित गरेको थिएन । आइतबार हेलिकोप्टर टुंगो लागेपछि स्वास्थ्यकर्मी र औषधिसहितको टोली पठाउने तयारी भईरहेको कर्णाली प्रदेशका सामाजिक विकासमन्त्री दल रावलले बताएका छन् ।