नेपालमा हुने मृत्युदरको ३० प्रतिशत कारण हृदय तथा मुटुजन्य रोग

हेल्थ टुडे,
काठमाडौ,१६ असोजः नेपालमा हुने मृत्युदरको ३० प्रतिशत कारण हृदय तथा मुटुजन्य रोग रहेको पछिल्लो एक अनुसन्धानले देखाएको छ । भाष्कर–तेजश्री स्मृति प्रतिष्ठानले गत वर्ष अर्थात सन् २०१८ को अप्रिल महिनामा गरेको अनुसान्धनले नेपालमा हुने मृत्युदरको ३० प्रतिशत हृदय तथा मुटुजन्य रोगका कारण हुने गरेको देखाएको छ । नेपालजस्ता अल्पविकसित मात्र नभई विकशित देशहरुमा समेत मुटु रोगको समस्या बढ्दो रहेको चिकित्सकले बताएका छन् ।

स्वास्थ्य तथा जनसंख्यामन्त्री उपेन्द्र यादवले विश्वभर नै हृदय तथा मुटुजन्य रोगको समस्या बढ्दै गएको भन्दै व्यस्त जीवनशैली, अस्वस्थकर खानपान, सरसफाई, शारीरिक व्यायमको कमीले गर्दा मानिसहरुमा यस्ता समस्या बढ्दै गइरहेका बताए । यस प्रकारका रोग नियन्त्रणको लागि मानिसहरुमा चेतना फैलाउन अति आवश्यक भएको मन्त्री यादवको भनाई छ ।

मुटु रोग विशेषज्ञ डा.भगवान कोइरालाले भनेः‘ दुई तिहाई मानिसको मृत्यु मुटु रोगका कारण हुने गरेको छ । कार्डियोभास्कुलर डिजिजको प्रमुख कारण भनेकै उच्च रक्तचाप हो ।’  मानिसहरुले पछिल्लो समय सबैभन्दा धेरै केमिकलयुक्त खाने कुराहरुको प्रयोग गरिरहेको र यसले गर्दा मानिसहरु दिन प्रतिदिन रोगी बन्दै गइरहेका चिकित्सकहरुको भनाई छ ।

उनीहरुले पछिल्लो समय धेरै जसो युवाहरु नै हृदयघातको शिकार हुने गरेको जनाएका छन् । नेपालमा हृदयरोग एक महामारीको रूपमा बढ्दै गइरहेको तर ८० प्रतिशत मुटु सम्बन्धी रोगहरू हामी आफैले रोक्न सक्ने विज्ञहरुको जिकिर छ ।

हृदयरोगका मुख्य कारक तत्व भनेकै सुर्तीजन्य पदार्थ, मदिरापान, पत्रु खाना, पेय पदार्थ सेवन, निष्क्रिय शारीरिक क्रियाकलाप र मानसिक तनाव हुन् । सुर्तीजन्य तथा मदिरापानको कुलतमा फसेका व्यक्तिहरु यस्ता कुलतबाट उम्कन गाह्रो हुने गरेको चिकित्सकको भनाई छ ।

मुटु तथा नसर्ने रोगबाट बच्नका लागि प्रर्याप्त मात्रामा फलफूल खानुका साथै खानामा नुनको मात्र कम गर्न र व्यायाममा ध्यान दिन चिकित्सकहरुले सुझाव दिएका छन् ।