सबै सांसदहरुको भोलि कोरोना परीक्षण, शुक्रबार थाहा हुनेछ कोरोना संक्रमणको अवस्था

हेल्थ टुडे,
काठमाडौं, २४ बैसाख : प्रतिनिधि सभा र राष्ट्रियसभाका सबै सासंदहरुको भोलिदेखि कोरोना भाइरस नमुना परीक्षण हुने भएको छ । बैसाख २६ गतेदेखि सुरु हुने बजेट अधिवेसनमा भाग लिनुभन्दा पहिले उनीहरुको स्वास्थ्य परीक्षण हुन लागको हो । कोरोना परीक्षणको नतिजा आएपछि मात्र उनीहरुलाई संसद भवनमा प्रवेश गराइने छ । अहिले प्रतिनिधि सभामा २ सय ७५ र राष्ट्रियसभामा ५९ सांसद छन् ।
संसद सचिवालयका अनुसार बिहीबार बिहान ११ बजेदेखि प्रतिनिधिसभाका सदस्यहरुको पीसीआर विधिबाट कोरोना भाइसरको परीक्षण सुरु हुनेछ । १० बजेदेखि राष्ट्रिय सभाका सदस्यहरुको परीक्षण सुरु हुनेछ । कोरोना परीक्षण गर्ने व्यवस्था संघीय संसद भवनमै मिलाइएको छ । परीक्षणका लागि स्वास्थ्य तथा जनसंख्या मन्त्रालयको विज्ञ समूह खट्ने छ । बिहीबारकै दिन सबैको स्वाब संकलन गरि सक्ने सचिवालयले जनाएको छ ।
सांसदहरुको टेष्ट गरिसकेपछि संसदका कर्मचारी र मर्यादापालक लगायतको स्वाब संकलन गर्ने व्यवस्था मिलाइएको सचिवालयका सूचना अधिकारी दशरथ धमलाले जानकारी दिए ।
मंगलबार बसेको कार्यव्यवस्था समितिले स्वास्थ्य मन्त्रालयलाई संसद भवन प्रवेश गर्नेहरुको स्वास्थ्य परीक्षणको व्यवस्था गर्न सरकारलाई निर्देशन दिएको थियो । भोली संकलन गरिएको स्वावको नमुना परीक्षणको नजिता शुक्रबार मध्यान्हसम्म आइसक्ने गरि तयारी अगाडि बढाइएको स्वास्थ्य मन्त्रालयका अधिकारीले जनाएका छन् । उक्त नमुना परीक्षणको नतिजाका आधारमा सांसदहरुलाई संसद भवन प्रवेश दिइने छ ।