सुस्वास्थ्य हस्पिटल छैटौं वर्षमा , १० हजार भन्दा बढीको सफल उपचार 

हेल्थ टुडे,

काठमाडौं, माघ १ : राजधानीको मीनभवन स्थित प्राकृतिक चिकित्सा सेवा उपलब्ध गराउदै आइरहेको सुस्वास्थ्य हस्पिटलले सफलताका साथ पाँच वर्ष पूरा गरि माघ १ गतेदेखि छैटौं वर्षमा प्रवेश गरेको छ । नेपालमै उत्कृष्ठ प्राकृतिक चिकित्सा सेवा प्रदान गर्ने अस्पताल बनाउने लक्ष्यका साथ वरिष्ठ अक्कुपँचरिष्ट सुदर्शन बस्नेतले पाँच वर्ष पहिले सुस्वास्थ्य हस्पिटल स्थापना गरेका थिए । औषधिविहीन उपचारपद्दतिहरूलाई एकीकृत रुपमा प्रयोग गरी विरामीको उपचार गर्ने र निरोगीलाई रोग लाग्न नदिने अवस्थामा राख्ने उद्देश्यसहित २०७२ साल माघ १ गतेदेखि अस्पतालले सेवा सुरु गरेको थियो ।

स्थापना कालदेखि अस्पतालले नसा तथा हाडजोर्नीका रोगीहरूको उपचार तथा व्यवस्थापन गर्दै आएको छ । सुस्वास्थ्यले पाँच वर्षको अवधिमा १० हजारभन्दा बढी बिरामीको सफल उपचार गरिसकेको अस्पतालको अध्यक्ष समेत रहेका वरिष्ठ अक्कुपँचरिष्ट सुदर्शन बस्नेतले जानकारी दिए । अस्पतालमा नसा च्यापिएको बिना अपरेसन उपचार, हड्डी खिइएको उपचार, पक्षघातको उपचार, माइग्रेन, अनिद्रा, डिप्रेसन र इन्जाइटीका बिरामी उपचारका लागि बढी आउने गरेका छन् । उनका अनुसार नसा च्यापिएका बिरामीको उपचारमा अस्पतालले ९० प्रतिशत सफलता प्राप्त गरेको छ । सुस्वास्थ्यले उपचारका साथै रोगी तथा निरोगीलाई स्वस्थ रहन आवश्यक स्वास्थ्य शिक्षा पनि प्रदान गरिरहेको छ । त्यस्तै विभिन्न संघसंस्थामा कार्यरत कर्मचारीका लागि कम्मर र गर्धनको समस्याबाट बच्ने तरिका, आसन र कसरत पनि सिकाउने गरिएको छ । अस्पतालले सञ्चारमाध्यम, कलेज, स्कुल, बैँक तथा वित्तीय संस्था र विभिन्न कर्पोरेट कार्यालयका कर्मचारीलाई कम्मर र गर्धनको समस्याबाट बच्ने उपाय सिकाइएको छ । अस्पतालले देशका विभिन्न १० स्थानमा निःशुल्क स्वास्थ्य शिविर सञ्चालन गरेको छ । स्वास्थ्य शिविरमार्फत पाँच हजारभन्दा बढीले निःशुल्क स्वास्थ्य सेवा पाएको अध्यक्ष बस्नेतले जानकारी दिए ।

सुस्वास्थ्य हस्पिटल त्रिपुरेश्वरबाट २०५६ सालदेखि अकुपञ्चर विधिबाट उपचार गर्ने गरी स्थापना भएको वैकल्पिक उपचार सेवा केन्द्रलाई विस्तारित रुप हो । आयुर्वेद विभागबाट १५ शय्याको स्वीकृति लिएर सञ्चालनमा आएको अस्पतालले सेवा विस्तारका लागि प्रदेशस्तरमा शाखा स्थापनाको तयारी पनि गरिरहेको अध्यक्ष बस्नेतले जानकारी दिएका छन् ।